Milli fasilənin “Neftçi” üçün faydalı olduğunu söyləyə bilərik. Flaqman bu müddətdən istifadə edərək noyabrın 18-də Rusiyanın ən titullu klubu olan “Zenit”lə yoxlama oyunu keçirdi. Özü də Bakıda. Düzdü, Sankt-Peterbuq təmsilçisi Bakıya oyundan bir gün qabaq gecə radələrində gəldi. Heç Bakıda oyunöncəsi məşqə də çıxmadı. Hiss olunurdu ki, “Zenit” bu görüşü o qədər də ciddiyə almır.

Uzun vədə yetişdi. Oyundan 1 saat əvvəl “Bakcell Arena”daydıq. “Neftçi”nin mətbuat xidməti “Zenit”lə matçla bağlı maraqlı təbliğat işləri görmüşdü. Hətta klubun sabiq üzvü Ruslan Abışov üçün vida mərasimi keçiriləcəyi də bildirilmişdi. Lakin bu işə yaramamışdı. Stadiona 4 minə yaxın azarkeş təşrif buyurmuşdu. Təşkilatçılıqla bağlı bir sıra problemlər var idi. Məsələn, “Zenit”in avtobusunu qarşılayan “Neftçi” nümayəndəsi yox idi. Rusların iki avtobusu azarkeşlər üçün nəzərdə tutulan qapıdan stadiona daxil oldur. Yaxşı ki, fanatlar rəqibə münasibətdə qeyri-etik hərəkətlər etmədi.

Oyunöncəsi tədbir olduqca maraqlı idi. Ruslan Abışov flaqmanın əsas heyətində meydana çıxdı. “Ağ-qaralar”ın əfsanəsi Samir Ələkbərov ona plaket hədiyyə etdi. Azarkeşlər Ruslanı yanına çağıraraq onları alqışladı. Qeyd etdiyimiz kimi, müdafiəçi qısa müddət meydanda qaldı. Adrian Mutu onu Azər Salahlı ilə əvəzlədi. Ruslan azarkeşlərə doğru gedərək onları alqışladı. Müdafiəçi gözyaşları ilə meydanı tərk edərək futbolla vidalaşdı.

Bununla da əsl futbol matçı başladı. Rumıniyalı mütəxəssis çətin duruma düşmüşdü. Emin Mahmudov, Eddi İsrafilov, Höccət Haqverdi, Fərid Yusifli kimi futbolçuları yığmaların düşərgəsində idi. İvan Brkiç, Emil Balayev, Qara Qarayev və Filip Ozobiç zədəli olduğu üçün qarşılaşmada iştirak edə bilmirdi.
Lakin rumıniyalı meydana ən ideal heyəti buraxmışdı. Rza Cəfərov qapıda dayanmışdı. Müdafiənin solunda Azər Əliyev çıxış edirdi. Mərkəzdə Azər Salahlı ilə Yuri Matias oynayırdı. Sağda isə Ervin Koffi yer almışdı. Dieqo Valdes dayaq yarımmüdafiəçi funksiyasını yerinə yetirirdi. Rezuian Mirzov sol, Rəhman

Hacıyev sağ cinah vingeri kimi çıxış edirdi. Andre Şinyaşiki pleymeykerlik edirdi. Aaron Olanere ilə Lukas Melano komandanın qol ümidi idi.
İlk dəqiqələrdən “Neftçi” yaxşı oyun sərgiləməyə başladı. Hücuma atılan bakılılar azarkeşləri təəccübləndirirdi. 9-cu dəqiqədə hesab açıldı. Rusiyalı vinger Mirzov driblinqləri ilə “Zenit” müdafiəçilərini çaş-baş salaraq topu qapıya göndərdi. Qonaqlar nəyin baş verdiyini anlaya bilmirdi. “Neftçi” azarkeşlərin dəstəyi ilə üstün oyun sərgiləyirdi. Sadəcə, hücum xəttində yer alan futbolçular zəif performans sərgiləyirdilər. Digər mövqelərdə çıxış edənlər isə hər şeyi qaydalara uyğun edirdi.

Birinci hissədə komandaların hesabı dəyişmək üçün yetərincə şansı oldu. Lakin tərəflər fərqlənə bilmədilər. Fasilədən sonra “Zenit” daha istəkli təsir bağışlamağa başladı. İlk 10 dəqiqədə ruslar “Neftçi”ni təzyiq altında saxlaya bildi. Bunun nəticəsində hesabı bərabərləşdirdilər. 56-cı dəqiqədə Du Keyros fərqləndi. Qol vurulan zaman “Neftçi”nin mərkəz müdafiəçilərinin səhvi diqqət çəkdi. Hesab bərabərləşəndən sonra bakılılar daha istəkli oynamağa başladı. Komandanın sol cinahı olduqca fəal idi. 62-ci dəqiqə Mirzov həmyerlilərini Bakıya gəlməyə peşman etdi. Rusiyalı gözəl reydini baxımlı qolla tamamladı.

Qalan dəqiqlərdə tərəflər qol vurmaq üçün çox çalışdı. Bu məsələdə “Zenit”in futbolçuları istəkli görünürdü. Lakin “Neftçi”nin müdafiəçiləri diqqətli oynayaraq qələbəni əldən vermədi. Son dəqiqədə İsmayıl Zülfüqarlı fərqi artıra bilərdi. Lakin əlinə düşən ideal şansdan yararlana bilmədi.
Beləliklə, “Neftçi” yoldaşlıq görüşündə Rusiyanın ən titulu klubunu 2:1 hesabıyla məğlub etdi. Yuxarıda qeyd etdiyimiz kimi, bu qarşılaşma flaqman üçün faydalı olacaq. Futbolçular gördülər ki, heyətdə çatışmazlıqlar olsa da, “Zenit” kimi rəqibi məğlub edə bilirlər. İndi qalır toparlanaraq çempionat matçlarında normal nəticələr əldə etmək. Hər halda, qış fasiləsinə kimi vəziyyətə düzəldərək çempionluq mübarizəsinə qoşulmaq olar.

İLKİN SULTANLI