Azərbaycan qadın voleybolundan həmişə parlaq oyunçular çıxıb. Bunlardan biri də "Abşeron"un 15 yaşlı yeniyetməsi Xədicə Seyidlidi.
"Football-plus.az" saytı Xədicə xanımla karyerası barədə söhbətləşib.

- Voleybolla neçə yaşından məşğul olmağa başlamısan?
- İlk dəfə 9 yaşımda Alla Həsənovanın yanında voleybolun sirlərini öyrənməyə başladım. 13 yaşımda isə "Abşeron"a transfer olundum. Bu komandaya keçəndə utanırdım, çəkinirdim, həyəcanlıydım. Çünki ilk dəfə təcrübəli yerli, həmçinin legioner oyunçularla birlikdə məşq edirdim. Fikirləşirdim ki, görəsən, növbəti il hardasa oynaya biləcəm? Yoxsa voleybolla vidalaşacam? Amma belə olmadı. Çalışqanlığımın, komanda yoldaşlarımın köməyi ilə bunun öhdəsindən gəldim. Bəzən səhv etdiyim vaxt kollektivimizin təcrübəli oyunçuları səbrlə mənə nəyisə izah edirlər. Bu da adama daha da motivasiya verir.
- Voleybola gəlişində ən çox dəstəyi kimdən aldın?
- Atamın təşəbbüsü ilə voleybola gəlmişəm. Heç vaxt fikirləşmirdim ki, hansısa komandada və ya millidə oynaya bilərəm.
- Bəs voleybolçu olmasaydın, hansı idman növünü seçərdin?
- Döyüş üslubunda olan idman növlərindən birini. Məsələn, kikboksinq, karate, güləş... Uşaq yaşlarımdan idmanı sevən biri olmuşam. Amma bu sahəni seçməsəydim, DTX-nın akademiyasına daxil olmaq istəyərdim.
- Öz mövqeyindəki çıxışını necə qiymətləndirirsən?
- Mən toppaylayıcı mövqeyində çıxış edirəm. Libero kimi də oynamaq istəyərəm. Amma çalışıram ki, çıxış etdiyim mövqeyin ən yaxşısı olum.
- Voleybolda kumirin var?
- Yox. Məsələn, fikirləşmirəm ki, bu voleybolçu kimi güclü olum. Məqsədim ondan da yaxşı olmaqdı. Buna görə də gecə-gündüz məşq edirəm.
- Gələcək hədəflərin nədi?
- Yaxş bir oyunçu olub tarixdə qalmaq istəyirəm. Qoy desinlər ki, Xədicə Seyidli "bir nömrə" olub. Necə ki, Alla Həsənova, Oksana Məmmədyarova, Valeriya Korotenka kimi hələ də unudulmayanlar var. Mən də belə voleybolçu olmaq arzusundayam. Karyeramı bitirəndən sonra isə yaxşı məşqçi kimi ad çıxarmaq hədəfim var.
- Hansısa məşhur voleybol klubunda oynamaq arzun var?
- Əslində belə arzum yoxdu. Məqsədim Azərbaycanı Avropada layiqincə təmsil etməkdi. Bunun hansı ölkə olacağının fərqi yoxdu. Amma Türkiyə "Vakıfbank"ında oynamaq istəyərəm. Çünki indi hansı oyunçu orda çıxış edirsə, deməli, həqiqətən də möhtəşəm oyunçudu. O kollektivdə yer almaq çətindi.
- Bəs bu mövsüm çıxış etdiyin "Abşeron"la hədəflərin nədi?
- Məqsədimiz ölkə çempionu və kubokun qalibi olmaqdı. "Abşeron" həmişə böyük iddia ilə yaşayır.

CAVİD ƏLİYEV