“Rəhbərliklə görüşümüz olacaq”
Misli premyer-liqasında 12-ci turun oyunları keçirilir.
“Football-plus.az” xəbər verir ki, “Qarabağ” - “Kəpəz”i darmadağın edib - 7:1. Matçdan sonra gəncəlilərin çalışdırıcısı Azər Məmmədovun mətbuat konfransı keçirilib. Sizi onun fikirləri ilə tanış edirik:
“Çox üzücü məğlubiyyətdi. Amma reallıq var. “Qarabağ” bizdən qat-qat üstündü. Onların əsas heyətinə qarşı oynamaq hər komanda üçün çətindi. Əsasən də bizim üçün. Uşaqlar nəsə etməyə çalışdı. Amma çalışmaqla bərabər, əzmkarlıq çatışmırdı. “Qarabağ”a qarşı ancaq əzmkar olsan, nəticə qazana bilərsən. Onlarla 1:1 oynayanda, əzmkarlıq göstərmişdik. Bu gün əzmkarlıq, mübarizlik çatışmadı. Bizim komanda sonuncu pillədədi. Bu yerdə olan komandanın nəticələri ürəkaçan olmur. Hər şeyə rəğmən çalışmışam ki, ehtiyat skamyada dik dayanım. Heç kim görməsin ki, məğlubiyyətə görə əyilirəm. Sadəcə bu gün özümü narahat hiss etdim. Uşaqlara səs tonu lazım idi, mən bacarmadım, Etibar müəllimə həvalə etdim”.
- Bu məğlubiyəytdən sonra öz taleyinizlə bağlı nə düşünürsüz?
- Acınacaqlı məğlubiyyətdi. Amma “Qarabağ” hər il başqa komandalarla matçda da böyük hesablı qələbələr qazanıb. Bu gün də bizim üzərimizdə qazandılar. Bu, mənə bərk toxunur. Bu gün rəhbərliklə görüşəcəm. Söhbətimiz olacaq. Qərar nə olacaqsa, yaxın günlərdə açıqlanacaq.
- Getmək haqda düşünürsüz?
- Düşünmürəm desəm, yalançı olaram. Bəli, düşünürəm.
- Bir müddət əvvəl xəbər çıxmışdı ki, bazada nəsə oğurlanıb, söz-söhbətlər çox olur. Gəncə futbolunun durumu niyə bu gündədi?
- Bakı klublarında təcrübəm olub. “Kəpəz”ə gedəndə çalışmışam ki, hər kəs öz işi ilə məşğul olsun. Mən də məşqçiyəm və öz işimlə məşğul idim. Digər sahələrin mənə aidiyyatı yoxdu, amma oxumuşam dediklərinizi. Gəncədə bu qədər söz-söhbətin olması, ən birinci “Kəpəz”in inkişafına maneədi. Söz-söhbətlər yığışdırılmalıdı. Hamı bir yumruq olaraq, “Kəpəz”in uğuru üçün döyüşməsə, bu, komandanın ziyanına işləyəcək.
Digər xəbərlər
