Gənclər və İdman Nazirliyi, Azərbaycan Kanoe və Avarçəkmə Federasiyasının birgə təşkilatçılığı ilə keçirilən akademik avarçəkmə, kayak və kanoe üzrə “Mingəçevir Reqatası-2023” beynəlxalq turnirinin ikinci günündə idmançılarımız 12 medal qazanıb.

"Football-plus.az" xəbər verir ki, 8 ölkədən 14 komandanın iştirakı ilə keçirilən yarışda avarçəkənlərimiz bu gün 3 qızıl, 4 gümüş, 5 bürünc medala yiyələniblər.

Birnəfərlik kanoe qayığında 500 metr məsafəyə 2007-08 təvəllüdlü idmançıların mübarizəsində Sənan Məmmədov 2-ci, Cavid Vəlizadə 3-cü yeri tutub.

Birnəfərlik kayak qayığında 500 metr məsafəyə 2007-08 təvəllüdlü idmançıların mübarizəsində Amil Ramazanov bütün rəqiblərini geridə qoyaraq çempionluq sevinci yaşayıb. O, ötən gün 1000 metr məsafəyə yarışda da fəxri kürsünün ən yüksək pilləsinə qalxmışdı.

İkinəfərlik akademik avarçəkmə qayığında 1500 metr məsafəyə 2007-08 təvəllüdlü oğlanların yarışında Fuad Məmmədov - Fikrət Həsənov cütlüyü ikinci olub.

İkinəfərlik kayak qayığında 500 metr məsafəyə 2007-08 təvəllüdlü idmançılar arasında 2 cütlüyümüz mükafatçılar sırasında yer alıb. Qiyas Əhmədov - Riad İsmayılzadə cütlüyü finişə birinci çatıb. Sübhan Həsənov - Rəşad Dadaşov dueti isə bürünc medala yiyələnib.

İkinəfərlik akademik avarçəkmə qayığında 1000 metr məsafəyə 2009-10 təvəllüdlü oğlanların yarışında Nurəddin Əliyev - Məhəmməd Abdullayev tandemi 3-cü yerin sahibi olub.

Birnəfərlik kanoe qayığında 200 metr məsafəyə 2007-08 təvəllüdlü oğlanların çıxışında Sənan Məmmədov “gümüş” əldə edib.

Birnəfərlik kayak qayığında 500 metr məsafəyə 2009-10 təvəllüdlü idmançılardan Əlimurad Hacızadə finişə üçüncü çatıb.

İkinəfərlik kayak qayığında 200 metr məsafəyə 2007-08l təvəllüdlü idmançılar arasında isə hər üç medala Azərbaycan idmançıları yiyələnib. Qiyas Əhmədov - Riad İsmayılzadə tandemi çempion olub. Bu, onların gün ərzində ikinci “qızıl”ı olub. Sübhan Həsənovla Rəşad Dadaşovun təşkil etdiyi cütlük gümüş, Emil Zeynalov - Rüfət Həsənzadə cütlüyü isə bürünc medal qazanıb.

Qeyd edək ki, “Mingəçevir Reqatası” sabah başa çatacaq.

CAVİD ƏLİYEV, Mingəçevir