"Sabah" Misli premyer-liqasının 10-cu turunda doğma meydanda "Sumqayıt"ı 3:1 hesabı ilə məğlub edib.

"Football-plus.az" xəbər verir ki, Masazır təmsilçisinin baş məşqçisi Murad Musayev matçdan sonra keçirilən mətbuat konfransında jurnalistlərin suallarını cavablandırıb:

- Bizim üçün çox vacib qələbə idi. Futbolçular xarakter göstərdilər. Əvəzetmədən oyuna girənləri də xüsusi qeyd etmək istəyərdim. Bərabər səviyyəli oyun oldu. "Sumqayıt"a xüsusi təşəkkür edirəm ki, biz avrokuboklarda oynayanda matçın təxirə salınmasına razılıq verdilər.

- Yusif İmanov neçənci dəfədi ki, yaxın küncdən qol buraxır. Bu, sizin üçün problemdi?
- Əlbəttə ki, problemdi. Hər qolun öz səbəbi var. Yusif bəzən canlı səddi düz qurmur, bəzən düzgün mövqe seçmir.

- Yusifi paltardəyişmə otağında çox danladınız. O hətta yerdə oturmuşdu...
- Bəli, Yusiflə və qapıçı məşqçisi ilə çox sərt danışdım. Dedim ki, belə hal qəbuledilməzdi.

- İki aydan sonra qələbə qazandınız. Demişdiz ki, bir qələbə bizi çətin vəziyyətdən çıxaracaq. Qələbələrin davamının gələcəyinə inanırsız?
- İnanıram ki, getdikcə daha yaxşı olacağıq. Əzmkar qələbəyə görə çox şadam. Hamının çiynində yük var idi. Çox sadə qollar buraxırdıq. İnanıram ki, düşdüyümüz vəziyyətdən çıxacağıq.

- Komanda bu gün çox güc sərf etdi. Üç gün sonra "Sumqayıt"la, sonra isə "Neftçi" ilə oyununuz var. Çətin olmayacaq?
- Bu, məni çox da narahat etmir. Avropa klubları belə qrafikdə oynayırlar. Düzdür, heyətdə itkilərimiz var. Vinsent Til, Jarl Marqarita millidə zədələniblər. Düşünürəm ki, bərpa ola biləcəyik.

- UEFA-nın yeni qanunundan sonra məşqçilərə çox sarı vərəqələr verilir. Bu haqda fikirləriniz maraqlıdı...
- Qanunlara riayət etməyə çalışacağıq. Daha təmkinli olmaq lazımdı.