"Kəpəz" srağagün heyətini yeni qapıçı ilə gücləndirdi.

Portuqaliyalı İqor Rodriges müqaviləyə əsasən mövsümün sonun qədər "sarı-göylər"in şərəfini qoruyacaq. Gəncə təmsilçisinin legionerini daha yaxından tanımaq üçün özü ilə əlaqə saxladıq. Qolkiper "Football-plus.az" ilə söhbətdə "Kəpəz" haqda ilkin təəssüratını bölüşməklə yanaşı, ölkə çempionatından və hədəflərindən söz açdı.

- Azərbaycana xoş gəldin. Bir müddətdi "Kəpəz"in düşərgəsindəsən. Yeni klubundakı ab-hava sənə necə təsir edir?
- Xoş gördük. Hər şey əladı. Mənə çox xoş münasibət göstərirlər. Komanda yoldaşlarım səmimi və mehriban insanlardı.

- Necə oldu ki, "Kəpəz"i seçdin?
- Bu layihə çox xoşuma gəldi. Təklifdən sonra Azərbaycanda çıxış edən futbolçu dostlarımla məsləhətləşdim. Hamısı bura haqda xoş sözlər dedi. Və artıq Gəncədəyəm.

- Deməli, ölkəmizdə çıxış edən oyunçularla dostluq münasibətlərin var. Kimləri nəzərdə tutursan?
- "Kəpəz"dən Latir Fall, "Qarabağ"dan Kevin Medina, "Araz-Naxçıvan"dan Nuno Rodriges və "Qəbələ"dən Bilel Auşeriya ilə yaxınıq. Onlar Azərbaycan haqda müsbət fikirdədi. Xüsusilə Latir gəlməyimi istədi.

- Azərbaycan premyer-liqasının durumu haqda məlumatın var?
- Təəssüf ki, geniş informasiyam yoxdu. Amma araşdırıram və dostlardan ətraflı bilgi öyrənməyə çalışıram. Mənə elə gəlir ki, rəqabətli çempionatdı və burda tab gətirmək üçün güclü olmalısan. Komandalar arasında böyük fərq yoxdu.

- "Kəpəz" indiki durumda autsayderdi. Bu səni narahat edir?
- Xeyr. Sadəcə, hədəfə köklənmək lazımdı. Düzdü, komanda çətin günlərdən keçir. Amma dediyim kimi, çox çalışsaq, bu işin öhdəsindən gələcəyik. Qarşıdakı oyunlarda şansları yaxşı dəyərləndirməliyik.

- Komandada səndən başqa daha üç qapıçı var. Start heyətində şans qazanmaq çətin olacaq?
- Ümumi məqsəd "Kəpəz"in uğur qazanmasıdı. Əlbəttə, meydanda olmaq istəyərəm. Bura işləməyə gəlmişəm. Həm komanda yoldaşlarıma, həm də baş məşqçimizə inanıram. Mənə hələ nə vaxt debüt edəcəyim haqda məlumat verilməyib. Çalışacağam ki, şans veriləndə özümü yaxşı tərəfdən göstərim.

- Gəncəli azarkeşlər tələbkardı. Uğurlu işi qiymətləndirdikləri kimi, çatışmazlıqları da çəkinmədən tənqid edirlər. Bu sənin üçün əlavə təzyiq yarada bilər?
- Məncə, çox yaxşı haldı. Azarkeş yaxşı nəticə tələb edirsə, deməli, komandaya inanır. Belə məsələlər furbolçuları həvəsləndirməlidi. Əlimdən gələni edəcəm ki, azarkeşlərin sevgisini qazanım və mənə güvənsinlər. Bunu edə biləcəyimə inanıram. İnanmasam, gəlməzdim.

KƏNAN BAHADIR