Son 10 ildə “Qarabağ” ölkə futbolu adına xeyli iş görüb.

Demək olar ki, bu idman növündəki bütün uğurlarımız “köhlən atlar”ın adı ilə bağlıdı. Elə ardıcıl 10 il avrokubokların qrup mərhələsinə vəsiqə qazanmaq nəyə desən, dəyər. Amma bəzi məqamlarda klub adına yaraşmayan hadisələr yaşanır. Məsələn, premyer-liqanın 9-cu turunda “Neftçi”yə 2:0 hesabıyla qalib gəldikləri oyundan sonra Elvin Cəfərquliyevin azarkeşlə dalaşması ölkə gündəmində bomba effekti verdi. Qurban Qurbanov kimi sərt xarakterli, intizamlı məşqçinin futbolçusu belə hərəkət etməməlidi. Heç çalışdırıcının söhbətə dəxli yoxdu. Elvin Cəfərquliyev millimizin üzvüdü. Tutaq ki, 12-13 yaşlı uşaq papağını oğurlayaraq qaçıb. Azyaşlı biri ilə dalaşmaq, onu yumruqlamaq sənə yaraşmır axı, Elvin. Yəqin ki, klub rəhbərliyi, həm də Qurban Qurbanov müdafiəçini bu hərəkətinə görə cəzalandıracaq.

Keçək əsas məsələyə! 9-cu turun oyunlarından sonra əsas və 21 yaşadək futbolçulardan ibarət yığma komandaların heyətləri açıqlandı. Canni de Byazi “Qarabağ”dan 4 futbolçunu – Toral Bayramov, Nəriman Axunzadə, Rahil Məmmədov və Elvin Cəfərquliyevi siyahısına daxil edib. Lakin Samir Əliyev Ağdam təmsilçisindən kimisə yığmaya dəvət etməyib. “Köhlən atlar”ın gürcüstanlı qolkiperi Luka Quqeşaşvili də buna əsəbləşib. Şəxsi “instaqram” hesabında U-21-ə dəvət almayan komanda yoldaşı Amin Ramazanova dəstək olub. Adi dəstək jesti olsaydı, başqa məsələ. Sadəcə, Luka AFFA-nın və milli komandaların rəsmi səhifələrini işarələyərək “gözünüzü açın” yazıb.

Adama deyərlər ki, sənə nə olub, a kişi? Okey, Aminə dəstək olmaq istəyirsən, bunu başa düşürük. Amma sən özün normal işlər gör ki, sonra məsləhət verə biləsən də. “Qarabağ” Aminlə sən ola-ola Andrey Lunyovu transfer etdi, Şahruddin Məhəmmədliyevi “Adana Dəmirspor”a yola saldı. Luka, istənilən səviyyədə olsaydız, Qurban Qurbanov sizə şans verərdi. Deyəsən, yadından çıxıb 2022-ci ildə Antalyadakı təlim-məşq toplanışından sənlə Aminin etdiyi səhvlər!

Əslində komanda yoldaşına dəstək olmağın şəxsən mənim xoşuma gəldi. Kaş bütün futbolçular sənin kimi ola. Amma nəzərə al ki, Amin bu mövsüm cəmi iki qarşılaşmada meydana çıxıb. Yusif İmanovun olduğu komandaya onun çağrılması nə dərəcədə düzgündü? Bəli, haqlısan, elə futbolçular var ki, öz komandasında normal oyun sərgiləməsə də, əsas və ya 21 yaşadək futbolçulardan ibarət yığmamıza dəvət olunur. Bu, bizim yaralı yerimizdi. Amma bu məsələ sənlik deyil axı. Başını aşağı sal, məşqini elə, Lunyovla mübarizədən qalib ayrılmağa çalış. Daha ölkənin əsas futbol qurumuna məsləhət vermək... Qətiyyən etik deyil!

İLKİN SULTANLI