"Düşünürəm ki, bu gün yaxşı oyun izləyə biləcəyik. Lakin oyuna təsir edən bəzi məqamlar var. Birincisi, "Qarabağ" Avropa Liqasının qrup mərhələsində "Həkken"i məğlub etdi. Biz gördük ki, komanda oyunun sonlarında çox güc sərf elədiyi üçün çətinlik çəkdi. Bu baxımdan hesab edirəm ki, Qurban Qurbanov əsas heyətin bəzi oyunçularına bu gün istirahət verəcək. Əvəzində isə gənc, perspektivli futbolçuları meydana buraxacaq. Bunu etmək məcburiyyətindədi də. Belə olan halda meydandakı heyətlər bir qədər bərabərləşəcək. "Qarabağ" son dövrlərdə çempionata belə başlamamışdı. Bunun da səbəbi ehtiyat qüvvənin gəncləşməsi və bir sıra oyunçuların komandadan ayrılmasıdı. Bu heyət də bəzən premyer-liqada oynamağa kifayət eləmir. "Neftçi"yə gəlincə, heyəti komplektləşib. Sadəcə, bəzi zonalar adamda sual yaradır. Məsələn, hücum mövqeyində olan oyunçular. Düzdü, "Turan Tovuz" üzərində son turda qələbə qazana bildilər. Lakin "Neftçi" kimi kollektiv Tovuz təmsilçisi ilə matçda belə zəif çıxış etməməliydi. Onsuz da "ağ-qaralar" çempionatın ilk turlarında elə xallar itirdi ki, ağdamlılarla mübarizədə və onlara çatmaq baxımından özləri üçün problem yaratdılar. İndi Mutunun komandası çempion olmaq istəyirsə, bu gün qalib gəlməlidi. Artıq avrokuboklarda da oynamırlar, oyunçular yetərincə istirahət edib. Amma hansı heyətlə bu oyuna çıxacaqları sual altındadı. Çünki hücumun mərkəzində kimin oynayacağı məlum deyil. Yadınızdadısa, Konfrans Liqasının oyunlarında bu mövqeydə Ozobiçə şans verilirdi. Yenidən belə olsa, yaxşı olar. Ancaq bu mənim fikirlərimdi. Hazırda komandadakı ab-havanı bilmirəm. Bu qarşılaşmaya proqnoz vermək çətindi. Çünki "köhlən atlar" ağır avrokubok oyunundan çıxıb, həm də heyətin necə olacağı dəqiq deyil. “Qarabağ” əsas heyətlə oynasa, "Neftçi"nin bu matçdakı şansları az olacaq".