"Deyərdim ki, turun yox ümumilikdə çempionatın mərkəzin matçlarından biridi. Turnir cədvəlində ilk 3 pilləni tutan komandaların bir-biri ilə görüşü çox vacib sayılır. Oyunun gərgin keçəcəyinə şübhə etmirəm. Bunu "Sabah"ın ağdamlılarla görüşü sübut elədi. Ümumilikdə götürsək, "Neftçi"nin potensialı "bayquşlar"dan daha aşağı görünür. Bunu turnir cədvəlində topladığı xal və heyəti göstərir. Çünki "Qarabağ" bu göstəricilərdə daha üstündü. Digər tərəfdən, buna qədər keçirilən oyunlarda ağdamlıların avrokuboklarda matçlarının olması "Neftçi" üçün daha rahat olurdu. Artıq dünya çempionatının keçirilməsi nəticəsində Qurban Qurbanovun komandası tam olaraq heyətdədi. Düşünürəm ki, mütəxəssis bu fasilədən layiqincə istifadə edə bildi. Məncə, "Neftçi"nin qarşısına ən optimal heyət çıxacaq. Oyunun texniki tərəfini dəyərləndirsək, təəccüblü nəsə görmərik. "Qarabağ"ın fərqli bir oyun sxeması yoxdu. Çempionat matçlarına baxsaq, görərik ki, komanda 4-1-4-1 taktikası ilə çıxış edir. Heyətin optimal olduğu halda bir tərəfdə Abdullah Zubir, hücumun sivri ucunda Kvabena Ovusu, digər cinahda isə Kadi Borqes ya da Ramil Şeydayev olacaq. Düşünürəm ki, heyətdə zədə problemi yoxdu. Ozobiçin yüngül xəsarəti var idi, amma o da sağalıb. Məncə, meydanın mərkəzində daha çox hakimiyyət "Qarabağ"da olacaq. Çünki Qurban Qurbanovun əlində daha çox futbolçu var. Marko Yankoviç, Qara Qarayev və hətta Ramil Şeydayevi bu mövqedə istifadə etmək mümkündü. Bu baxımdan "Qarabağ" dominant oynamağa, topa daha çox nəzarət etməyə çalışacaq. Komanda Zubirin sürətli keçidlərindən də istifadə edəcək. Həmçinin, yığmanın heyətində ulduzu parlayan Musa Qurbanlıdan da istifadə etmək mümkündü. Müdafiə xəttində Bədavi Hüseynov və Kevin Medina da məncə, zədələrini sağaldıblar. Belə olan halda "köhlən atlar"ın arxa xətti "Neftçi"nin qarşısını ala biləcək potensiala malikdi. "Neftçi"yə gəldikdə isə "ağ-qaralar"da meydanın mərkəzində Ata Caber, Emin Mahmudov kimi oyunun istiqamətini dəyişə biləcək futbolçular var. Amma onların "Qarabağ"ın orta xəttinə nə dərəcədə qalib gələcəyi sual doğurur. Bakılıların yarımmüdafiəsi ağdamlılara nisbətən uduzur. Paytaxt təmsilçisinin müdafiə xəttində də vəziyyət ürəkaçan deyil. Cinah müdafiəçiləri "köhlən atların"kinə nisbətən effektsiz görünür. "Qarabağ"ın sağ cinahında Marko Veşoviç ümumiyyətlə çox əla mövsüm keçirir. Onu öz mövqeyində çempionatımızın ən yaxşısı saymaq olar. Sol cinahda isə istər Elvin Cəfərquliyev olsun, istər Toral Bayramov olsun əla performans göstərir. Dediklərimin fonunda, məncə, "Qarabağ" 3 xala daha yaxındı".