UEFA avrokubok turnirlərinin yeni formatı üzərində işləyir.

“Football-plus.az” xəbər verir ki, “El Pais”in yaydığı məlumata görə, qitə futbol qurumu Avropa Klublar Assosiasiyası (ECA) ilə birgə üç diviziondan ibarət yeni turnirin konsepsiyasını hazırlayır. Bu yöndə müzakirələr sentyabrın sonundakı görüşdə başlasa da, dəyişikliklər 2027-ci ildən tez qüvvəyə minməyəcək.

Yeni turnirin layihəsi üç divizionun – Superliqa, Avropa Liqası və İddiaçılar Liqasının yaradılmasını nəzərdə tutur. Divizionların hər birində 18 komanda olacaq. Liqalar arasında yuxarı qalxmaq və aşağı düşmək nəzərdə tutulub: Superliqa ilə Avropa Liqası arasında 2, Avropa Liqası ilə İddiaçılar Liqası arasında 4 komandanın.

Bundan başqa, qalxmaq və aşağı düşmək bir mövsümün nəticəsindən yox, son 3 və ya 5 il ərzindəki orta göstəricidən asılı olacaq.
Təqvimlə bağlı problemləri həll etmək üçün hər divizion iki qrupa bölünə bilər. Superliqanın turnir cədvəlində komandanın milli liqadakı nəticələrinin nəzərə alınması da mümkündü, bu iştirakçıya əlavə bonus qazandıracaq. Hər klubun iştirak ərizəsi isə 34 oyunçuya qədər genişlənə bilər.