Misli premyer-liqasının 6-cı turunda "Qarabağ"ın qonağı olan "Sabah" məğlub oldu - 0:2.

"Football-plus.az" xəbər verir ki, Masazır təmsilçisinin baş məşqçisi Murad Musayev matçdan sonra keçirilən mətbuat konfransında jurnalistlərin suallarını cavablandırdı. Mütəxəssisin matçla bağlı fikirləri:

- Davit Volkov neçə oyundu ki, qol vura bilmir. Onun oyununu necə dəyərləndirirsiz? Sizcə, çempionluğa oynayan komandanın daha yaxşı hücumçusu olmalı deyil?
- Volkovun qol epizodu çox olmur. Keçən oyunda da olmadı, bu gün də... Ötən mövsüm bombardirlərimiz cinah oyunçuları olub. Tək Volkovda yox, bütün futbolçularda problem var.

- Tam formalaşmış "Sabah"ı görmək üçün nə qədər vaxt lazımdı?
- Elə heyəti müəyyənləşdirmək üçün bizə nə qədər vaxt lazım olduğunu dəqiq deyə bilmərəm. Özüm meydana çıxıb futbol oynamıram... Amma bilirəm ki, bu vəziyyəti düzəltmək üçün çox işləməli, bəzi şeyləri dəyişməliyik.

- Bu gün əvvəlki oyunlarla müqayisədə daha sakit idiz. Məğlubiyyəti əvvəlcədən qəbul etdiyini deyə bilərik?
- Siz bir fikirdə dayanmalısız. Sakit olanda öncədən məğlubiyyətlə barışdığımı, danışanda, əsəbləşəndə də kart görəcəyimi deyirsiz. Mənə birdəfəlik deyin. Özümü necə aparım?

- Komanda "Partizan"a məğlubiyyətdən sonra psixoloji olaraq böhran yaşayır, uğursuzluq zolağındasız. Bunu nə ilə əlaqələndirirsiz?
- Bizə motivasiya verməsi üçün cəmi bir qələbə lazımdı. "Partizan"a məğlub olduqdan sonra oyunçular məyus olub özlərinə gələ bilmirsə, belə idmançılar getsin futbolu televizordan izləsin. Uğursuzluq varsa, daha çox işlə, yaxşı nəticə göstər. "Partizan"la bir məğlubiyyətə görə çökmüsənsə, "Sabah"da, futbolda qalmaq lazım deyil. "Partizan"a məğlubiyyəti psixologiya ilə əlaqələndirmirəm. Günahkar özümüzük. Hər oyunda xarakter göstərmək lazımdı. Ötən mövsüm standart vəziyyətdən bir qol da buraxmamışdıq. Ardıcıl iki turdu isə üç qol buraxmışıq. Bu, sadəcə konsentrasiya itkisidi. Hər şey öz əlimizdədi. İşimizi yaxşı görməliyik. Bunu edəcəyiksə, yaxşı nəticə olacaq. Etməyəcəyiksə, neqativ nəticə alacağıq. "Zirə"ylə, "Neftçi"ylə oyunda şansımız gətirmədi demək istəmirəm. Sadəcə, bu xətti qırmaq lazımdı. Bəlkə də başqa xarakter lazımdı. Onda qələbələr olacaq. Yenə deyirəm, ötən günlə yaşayırsansa, idmanda olmamalısan.

- Dediz ki, meydana çıxıb futbolu mən oynamıram. Formalaşmış heyətlə bağlı da konkret fikrinizi bilmədik. Baş məşqçinin işi elə normal heyət formalaşdırıb meydana buraxmaq və futbolçulara nəzarət etmək deyil?
- Mən öz öhdəliklərimi bilirəm. Uzun müddətdi ki, baş məşqçi kimi çalışıram.işləyirəm. Məndən nə eşitmək istəyirsiz Demədim ki, heyətin nə vaxt özünə gələcəyini bilmirəm. Soruşdular ki, qara zolaqdan çıxmaq üçün nə qədər vaxt lazımdı? Dedim, bilmirəm... Məsələn, soruşursaz ki, siqaret çəkməyi nə vaxt buraxacaqsan? Deyəcəm bu gün. Amma futbol başqa cürdü... "Kəpəz"lə matçda hər şey yaxşı olması üçün əlimdən gələni edəcəm. Necə alınacağını bilmirəm. Sadəcə, pis gedən gedişatı dəyişmək istəyirəm. Azarkeşlərin, medianın narazılığını da anlayıram. Başda mən olmaqla biz buna layiqik. Təbii ki, bizi tənqid etməlisiz. Özümüz də özümüzdən narazıyıq. Sabah hər şeyin yaxşı olması üçün məndən nə asılıdısa onu da edəcəm. İstəyirəm ki, hər şey fərqli olsun. 9 yeni oyunçumuz olduğunu bəhanə etmək lazım deyil. Çünki nə "Turan Tovuz"la, nə də "Zirə"ylə bu cür oynamalı deyildik.

- Ayaz Quliyevin fiziki durumunu necə dəyərləndirirsiz?
- O, həmişəki formasından uzaqdı. Hazırda cəmi 25 dəqiqə oynamağa hazırdı. Yeni transferləri də 3 aydı oynamırlar, təlim-məşq toplanışı belə keçməyiblər. Jarl Marqarita da toplanışın çox hissəsini buraxıb. Onlara vaxt lazımdı.

KƏNAN BAHADIR