Azərbaycanı minifutbol üzrə Avropa Kubokunda təmsil edən “Zəngəzur” Bolqarıstanda keçirilən yarışda yarımfinala vəsiqə qazanıb. Əjdər Əjdərovun çalışdırdığı komanda finala gedən yolda Rumıniyanın "Borussiya" komandası ilə qarşılaşacaq.

“Football-plus.az” xəbər verir ki, oyun bu gün, Bakı vaxtı ilə 12-də başlayacaq. Oyundan əvvəl "Zəngəzur"un ulduzlarından Əfran İsmayılovla söhbətşdik.

- Böyük futboldan sonra minifutbol oynamaq necə hissdi?
- Çox maraqlıdı. Böyük futboldan sonra sevdiyim, bəyəndiyim ikinci, bəlkə də birinci idman növü minifutboldu. Həmişə izləmişəm. Burda oynayan uşaqları da tanıyıram. Bilirsiz ki, karyeramı bitirəndən sonra "Araz-Naxçıvan"da işə başladım. Bizdə də Şahin müəllim var, o, məni "Zəngəzur"un heyətinə çağırdı. Mən də canla-başla, təmənnasız oynayacağımı dedim. "Araz-Naxçıvan"ın prezidenti Zaur müəllim də "harda Azərbaycan adı varsa, problem deyil, Əfran, get, oyna" dedi. Biz də əlimizdən gələni edib vətənə yaxşı nəticə ilə qayıtmaq istəyirik. Bu gün həm yarımfinal, həm də final oyunu olacaq.

- Səncə, "Zəngəzur" kuboku qazan bilərmi?
- Əlbəttə, qazana bilərik. Bura kimi gəlmişik. Burda güclü, zəif bilinmir. Kim ağıllı olsa, o da nəticə qazanacaq.

- Komandanın yarımfinala qədər olan çıxışı barədə nə deyə bilərsən?
- Hər şey bizim üçün yaxşı gedir. Burda Rumıniya, Bolqarıstan, Slovakiya, hətta Səudiyyə Ərəbistanının da iddialı komandaları var idi. İndi yarımfinala qalmışıq. Rəqibimiz də rumınlardı. İnşallah, finala vəsiqə qazansaq, orda da Rumıniya təmsilçisi ilə qarşılaşacağıq. Şəhər, atmosfer, qaldığımız otel çox gözəldi. Yalnız o qalıb ki, burdan uğurlu nəticə ilə qayıdaq.

- Azərbaycan minifutbolunun hazırkı durumunu və gələcəyini necə görürsən?
- Gündən-günə minifutbol inkişaf edir. Artıq futzal oynayanlar da minifutbola gəlib. Gələcəkdə uğurlarımız daha da çox olacaq. İndi milli komanda dünya çempionatına gedir. İnanıram ki, ordan da yaxşı nəticə ilə qayıdacağıq.

- Bir halda ki, bu komandada işlərin uğurlu alınır, bəlkə yığmanın sabiq üzvlərindən ibarət əlavə komanda yaratmaq fikrindən daşınasan?
- Komandamı yaradacam. "Zəngəzur"a müvəqqəti gəlmişəm. Bakıya qayıdandan sonra bu məsələ barədə danışacağıq.

CAVİD ƏLİYEV