"Kəpəz" ölkə çempionatının son turunda evdə "Araz-Naxçıvan"a uduzdu.

"Sarı-göylər"dən Mate Kvirkviya penaltini dəqiq yerinə yetirdi. Gürcü vinger oyundan sonra "Football-plus.az"ın suallarını cavabladı.

- Mate, "Kəpəz" evdə premyer-liqanın debütantına məğlub oldu. Matçı necə dəyərləndirirsən?
- Vacib oyunda xal itirdik. Daha fərqli nəticə əldə etmək lazım idi. Əlimizdən gələni etsək də, alınmadı. Təəssüflənirəm, amma bu, hələ heç nə demək deyil. Çempionat yeni başlayıb.

- Komandanın yeganə qolunu sən vurdun. Heç-heçə və ya qələbə üçün nə çatmadı?
- Heyətimiz yeni qurulub. Məncə, futbolçularda konsentrasiya problemi var. Bir-birimizi düzgün anlaya bilmirik. Daha yaxşı olmaq üçün bizə zaman lazımdı. "Kəpəz"in oyunçuları zəif deyil.

- Yeni mövsümdə penalti nöqtəsindən iki qol vurmusan. Deyəsən, digər epizodlarda fərqlənmək çətinləşib...
- Düzdü, rəqiblər yay fasiləsində çox çalışıb. Qol vurmaq ötən mövsümə nisbətən daha çətindi. Amma bacaracağıma inanıram. Hədəflərim yüksəkdi. Qollarım daha çox olmalıdı. Penaltidən fərqlənməyim isə normaldı. Cərimə zərbələri oyunun bir hissəsidi, hər şey qanun çərçivəsində olur. Heç qol vurmasam, necə olacaq?! (gülür)

- Rəqiblərin gücləndiyini deyirsən. Səncə, "Kəpəz"i mövsümün sonunda harda görəcəyik?
- Qısa cavab verəcəm: premyer-liqada qalmaq istəyirik.

- Səncə, "Kəpəz" bunu bacaracaq?
- Premyer-liqanın iddialı klublarıyla qarşılaşmışıq. "Neftçi"yə qalib gəldik, "Qarabağ"dan xal aldıq. Düşünürəm ki, hər iki matçda yaxşı çıxış etdik. Digər rəqiblərdə mübarizədə də həmin oyunları göstərsək, yaxşı olar.

- Tribunada sənə xüsusi dəstək var idi. Maraqlıdı ki, azarkeşlər qol vurmadığın oyunlarda da sənə ehtiram göstərir...
- Onlar məni çox sevir. Cəsarətlə deyə bilərəm ki, Azərbaycanın ən yaxşı azarkeşləri Gəncədədi. Nəticədən asılı olmayaraq, həmişə yanımızda olurlar. Mən də performansımla onlara təşəkkür etmək istəyirəm. Tərəfdarlarımızı sevindirmək məni qürurlandırır.

- 6-cı turda "Səbail"lə görüşünüz var. Bayıl təmsilçisi "Qarabağ"ı məğlub edə bildi. Gözləntin necədi?
- Hər komandanın oyunlarını izləyib təhlil edirəm. "Səbail"in maraqlı tərzi var. Heyətində güclü futbolçular çıxış edir. Amma heç kimdən qorxmuram. Meydana çıxıb futbol oynayacam. İnanıram ki, qələbə qazanacağıq.

KƏNAN BAHADIR