"Qəbələ" Misli premyer-liqasının 5-ci turunda "Zirə"ni qəbul edib - 1:0.

"Football-plus.az" xəbər verir ki, matçdan sonra "Qəbələ"nin prezidenti Fariz Nəcəfov jurnalistlərin suallarını cavablandırıb.

- Ardıcıl 4 məğlubiyyətdən sonra komandanız bu gün ilk qələbəsini qazandı. “Zirə” üzərində qələbəni necə şərh edərdiz?
- Komandamız bu dəfə daha yaxşı oynadı. Bu oyunla dirçələcəyik. Qələbəyə baxmayaraq, bu yenə də mənim istədiyim oyun, həmin "Qəbələ" deyil, hər 8-10 dəqiqədən bir rəqib qapısında təhlükə yaratmırıq. 

- Bu qələbə psixoloji baryeri aşmağa imkan verəcək?
- Liderə qalib gəlmişik. Bəli, düşünürəm ki, bu qələbə psixoloji baryeri keçmək üçün kömək olacaq. Əslində, 5-ci turda qələbəyə hər cür fikir bildirmək olar. Komandanın hansısa oyunda qələbə qazanacağına inanırdım. "Sabah"la oyun istisna olmaqla əvvəlki matçlarda da pis oynamırdıq. Həmin görüşdə komandada yorğunluq var idi. Cəmi 2 gün vaxtımız olmuşdu, yolda çox vaxt itirmişdik. Gözləyirdik ki, oyun təxirə salınsın. Amma PFL fərqli qərar qəbul etdi. 

- Oyunun təxirə salınması üçün PFL-ə müraciət etmişdiz? 
- Xeyr, müraciət etmək istəmədik. Onlar özləri bunu düşünməli idi. Nəzər almalıydılar ki, bir gün yolda olmuşuq. Sanki həmin oyunda olan məğlubiyyətlərə görə komanda həmin atmosferdən çıxa bilmir. Analizlər edib çox şey danışmaq olar. Bu vəziyyətdən çıxmaq lazımdı. Öz oyunumuzu göstərməliyik. 

- Belə söhbətlər gəzirdi ki, bu oyunda məğlubiyyət Elmar Baxşıyev üçün sonuncu ola bilər... 
- Xeyr, bu, mümkün deyil. Komanda liqada qalmaq şərtiylə Elmar Baxşıyev “Qəbələ”dən getməyəcək. Elmar Baxşıyevə və futbolçularıma tam inanıram. İnanıram ki, yaxşı oyun göstərib azarkeşlərimizi sevindirəcəyik. Baş məşqçinin qarşısına avrokuboklara vəsiqə qazanmaq kimi bir tapşırıq qoyulmayıb. 3 il ard-arda avrokuboklarda çıxış etdik. Ola bilər ki, bu mövsüm belə bir nailiyyət əldə edə bilməyək. 

- Transfer pəncərəsinin bağlanmasına az qalıb. Yeni futbolçunun gəlişi gözlənilir?
- Danışıq apardığımız futbolçu var. Hücum mövqeyində çıxış edir. Yəqin ki, qarşıdakı günlərdə bu keçidi reallaşdıracağıq. 

- Belə görünür ki, “Qəbələ”nin maliyyə durumunda bir dəyişiklik yoxdur...
- Ötən illərdə komanda tam dağıldığı bir anda sıfırdan heyət yığdıq. Futbolçularla 1 illik müqavilə imzalamağımız səbəbsiz deyil. Çünki dövlətin ayırdığı maliyyə hər dəfə bir illik olur, heç kim təminat vermir ki, bu, uzunmüddətli olacaq. Ona görə də 1 illik müqavilə bağlamalı oluruq. Əks halda gərək evimi, maşınımı satım, futbolçuların pulunu verim. Büdcə asılılığı dayanıqlı deyil. 

- Keçən il akademiya ilə bağlı sponsor cəlb olunmuşdu. Bunun ardı gələcək?
- Danışıqlar gedir. Sponsorlar dostluq əlaqələrimdən yaranan bir şeydi. Hamıdan çox mən istəyirəm ki, akademiya daha da güclü olsun. 

- Sabiq futbolçunuz Qismət Alıyev həmişə Qəbələdə azarkeşlərlə insident yaşayır. Bunun səbəbi nədi?
- Qismət burdan narazı ayrılmayıb. Akademiyanın ən uğurlu oyunçularından olub. Onun xətrini çox istəyirəm. Oyununu dəstəkləyirəm. Azarkeşlər bəzən ondan qaydalara riayət etməsini istəyir. Oyunla bağlı ona heç kim heç nə deyə bilməz. Bu məsələyə şəxsən mən cavabdehəm.