Ölkəmizin avrokuboklardakı yeganə təmsilçisi “Qarabağ”ın hansı turnirin qrup mərhələsində yoluna davam edəcəyinə bu gün aydınlıq gələcək. Avropa Liqasının ilk pley-off oyununda “Olimpiya”nı səfərdə 2:0 hesabıyla məğlub edən ağdamlıların məhz bu turnirin qrupuna düşməsi daha realdı.

"Football-plus.az" xəbər verir ki, Tofiq Bəhramov adına Respublika stadionunda böyük sensasiya baş verməsə, “Qarabağ” sentyabrın 1-də təşkil olunacaq AL-in püşkatma mərasimində rəqibləri ilə tanış olacaq. Azərbaycan çempionu püşk zamanı 2-ci və ya 3-cü səbətdə yer alacaq. İndiki məqamda “Qarabağ” 3-cü səbətin ən yüksək reytinqli komandasıdı. Ancaq bütün iştirakçılar hələ dəqiqləşmədiyindən “köhlən atlar”ın 2-ci səbətə yüksəlmək ehtimalı da var.

Avropa Liqasında səbəti qeyri-müəyyən olanlardan “Marsel”in püşkatma zamanı “Qarabağ”dan yuxarıda olacağı dəqiqdi. Bu isə o deməkdir ki, Qurban Qurbanovun rəhbərlik etdiyi komandanın 3-cü səbətə düşməsi üçün Çempionlar Liqası (ÇL) və Avropa Liqasının pley-offlarında ümumilikdə bir sensasiya baş verməlidi.

Çempionlar Liqasının pley-offunda PSV (Niderland) – “Reyncers” (Şotlandiya) və AEK (Yunanıstan) – “Antverpen” (Belçika) oyunlarının “Qarabağ”ın mövqeyinə heç bir təsiri olmayacaq. Çünki ilk cütdəki komandaların reytinqi Azərbaycan çempionundan yuxarı, ikinci duelin iştirakçılarında isə aşağıdı. Ancaq “Kopenhagen” (Danimarka) – “Rakuv” (Polşa) matçının nəticəsi böyük önəm daşıyır. Ağdamlılar onları turnirdən kənarlaşdıran Polşa çempionunun Avropa Liqasına yuvarlanmasını arzulamalıdı. Çünki belədə “Qarabağ”ın ikinci səbətə düşmək şansı bir qədər artacaq. Həmin cütdə “Kopenhagen”in uğuru təmsilçimizi Avropa Liqasında bir, “Rakuv”un qələbəsi isə iki sensasiya gözləməyə məcbur edəcək.

AL-də “Ayaks” (Niderland) – “Ludoqorets” (Bolqarıstan) cütündə ikincilərin, “Zarya” (Ukrayna) – “Slaviya” (Çexiya), “Çukariçki” (Serbiya) – “Olimpiakos” (Yunanıstan), “Zrinski” (Bosniya və Hersoqovina) – LASK (Avstriya) duellərində birincilərin mərhələ adlaması “Qarabağ”ın işinə yarayacaq.
“Rakuv” “Kopenhagen”ə öz meydanındakı ilk matçda 0:1 hesabı ilə uduzub. Yəni bu cütdə polşalıların növbəti mərhələ şansı minimuma bərabərdi. Bu da o deməkdir ki, AL-də yuxarıda sadalanan 4 qarşılaşmadan heç olmasa, birində gözlənilməz nəticə qeydə alınmalıdı. Onlardan ən real görünəni “Zrinski”nin mümkün qalibiyyətidir. Çünki bosniyalılar səfərdə keçirilən ilk görüşdə minimal fərqlə məğlub olub. “Ayaks”ın oyununda sensasiya artıq möcüzə kimi görünür. Niderland təmsilçisi rəqib meydanında 4:1 hesablı qələbə qazanıb. “Zarya” və “Çukariçki” səfərdəki iki top fərqli məğlubiyyətin əvəzini çıxmalıdı.

Qeyd edək ki, Çempionlar Liqasında pley-offun son oyunları dünən keçirilib, Avropa Liqasında cavab qarşılaşmaları isə bu gün keçiriləcək.