Braziliyanın U-17 və U-20 millisinin sabiq futbolçusu Qabriel Boskiliya “Qarabağ”a keçə bilər.

"Football-plus.az" xəbər verir ki, bu barədə “terra.com.br” saytı məlumat yayıb.

Bildirilib ki, ölkəsində “Koritiba”nın formasını geyən 27 yaşlı yarımmüdafiəçi tezliklə “Qarabağ”la münasibətləri rəsmiləşdirəcək. Boskiliya artıq “Koritiba” ilə yolları ayırıb.

Əsas mövqeyi pleymeyker olan “sambaçı” sağ və sol vinger kimi də çıxış edə bilir. O, karyerası ərzində Fransanın “Monako”, “Nant”, Belçikanın “Standard” klublarında legioner həyatı yaşayıb. Ölkəsində “İnternasional”ın da formasını geyib.

Qeyd edək ki, bu mövsüm “Koritiba”nın heyətində 13 oyunda meydana çıxan Qabriel yalnız üç matçda start heyətində yer alıb və hesabına 1 qol yazdırıb. Redaksiyamıza daxil olan məlumata görə, futbolçu ilə danışıq aparılsa da, razılaşma əldə olunmayıb. Ağdamlılar indi hücumçu axtarışındadı. Onlar sentyabrın 5-nə kimi heyətə iki forvard qatmağı planlaşdırır.