Maqnus Karlsen oteldə yox, başqa yerdə zəhərlənib! – ÖZƏL
Bakıda keçirilən şahmat üzrə dünya kuboku sona yaxınlaşdıqca narazılıqların da sayı artır. Yadınızdadısa, turnirin əvvəlində Bakıya qonaq qismində gələn Aleksandr Xalifman səhər yeməyindən narazılıq etmişdi, ardından Hikaru Nakamura susuzluğu önə çəkdi. Dünən isə dünya şahmatının əfsanəsi Maqnus Karlsen dilə gəlib. 16-cı dünya çempionu FİDE-nin rəsmi saytına açıqlamasında Bakıda zəhərləndiyini deyib:
"Əslində rəqib çətin tay-brek oynadığı vaxtda mən istirahət edib, üstünlük əldə etməliydim. Lakin bir neçə gündü özümü çox narahat hiss edirəm. Nicat Abbasovla oyundan sonra qidadan zəhərlənmişəm. Son iki gündə yemək yeyə bilmirəm. Bu gün ona görə sakit idim ki, həyacanlanmağa, əsəbləşməyə belə halım yox idi".
Son zəhərlənmə olayı ilə bağlı “Football-plus.az” maraqlı bilgi əldə edib. Karlsen nə oyunların keçirildiyi “Baku Marriott Boulevard” otelini qınaya bilər, nə də təşkilatçıları – Azərbaycan Şahmat Federasiyası ilə FİDE-ni. İş ondadı ki, norveçli oteldə yox, Bakıdakı restoranların birində qəbul etdiyi qidadan zəhərlənib. O, Meksika mətbəxinin təamlarından dadmaq istəyib ki, belə arzuolunmaz hadisə yaşanıb.
CAVİD ƏLİYEV
Digər xəbərlər
