Bu gün futbol üzrə 1-ci və 2-ci liqaların yeni mövsümünün püşkü atılıb.

Saat 15.00-da başlayan tədbir AFFA-nın inzibati binasında baş tutub. Tədbirdə PFL-in vitse-prezidenti Aslan Şahgəldiyev, teniki-idman direktoru Elgiz Abbasov, marketinq və media meneceri Sənan Abdullayev və bütün klubların nümayəndələri iştirak edib. Püşkatmadan sonra veteran futbolçu, 2-ci liqada çıxış edəcək "Füzuli"nin baş məşqçisi Amit Quluzadə ilə söhbətləşdik.

- Püşk atıldı, ilk turdakı rəqibiniz də "Cəbrayıl" oldu.
- Çox sevinirəm ki, rayon komandaları bu liqada çıxış edəcəklər. 2-ci liqa yeni yaradılsa da, maraq böyükdü. Mən özüm də Füzulidənəm və məqsədim doğma rayonumun komandasının çempionatda yaxşı və nümunəvi olmasına çalışmaqdı. Bir aydı hazırlığı davam etdiririk. 1-ci turda rəqibimiz olacaq "Cəbrayıl"la da yoxlama oyunu keçirmişik.

- Hədəfləriniz nədi?
- Hədəflərimiz haqda çempionat başlayandan sonra dəqiq danışa biləcəyik. 4-5 oyundan sonra məqsədimizin nə olacağını aydınlaşdıracağıq. Rəqiblərimizi də tanımalıyıq.

- Yeni transferlər olacaq?
- Heyəti komplektləşdirmişik. Ola bilər ki, komandanın daha da güclənməsi üçün heç kimin gözləmədiyi, sürpriz iki tanınmış futbolçu ilə anlaşaq.
Xatırladaq ki, 1-ci liqada oyunlar sentyabrın 4-də, 2-ci liqada isə sentyabrın 13-də start götürəcək.

CAVİD ƏLİYEV