Qadın voleybolçulardan ibarət yığma sabah AÇ-də ilk oyuna çıxacaq.

Rəqib isə Çexiyadı. Komandanın turnirə hazırlığı ilə bağlı Voleybol Federasiyasının mətbuat xidmətnin rəhbəri, sabiq voleybolçu Şəfəq Kərimova ilə söhbətləşdik.

- Milli komandanın AÇ-yə ayyarımlıq hazırlığı barədə danışardız…
- Hazırlıq başa çatdı. Qızlarımız artıq turnirin keçiriləcəyi Almaniyanın Düsseldorf şəhərindədi. Toplanış müddətində bir sıra yoxlama oyunları keçirildi. Qalib gəldiyimiz, məğlub olduğumuz və heç-heçə etdiyimiz oyunlar oldu. Kiçik zədə alanlar olsa da, şükür, indi hər şey qaydasındadı.

- Şəfəq xanım, azarkeş dəstəyi ilə bağlı Almaniyadakı səfirlik və diaspor ilə əlaqə saxlamısızmı?
- 20 gündən çoxdu ki, federasiya səfirlik və diaspor üzvləri ilə əlaqə saxlayır. Bilirsiz ki, qrupdan çıxa bilsək, Belçikaya yollanacağıq. Buna görə də həmin ölkədəki vətəndaşlarla da əlaqə qururuq. Ordakı soydaşlarımız bizə dəstək olacaq. Lakin onların sayı haqda məlumatımız yoxdu.

- Yeni rəhbərlik gələndən sonra bölgələrdə seleksiya işləri aparılır. Bu prosesin gedişi barədə məlumat verərdiz…
- Yeni rəhbərliyin gəlişindən sonra bölgələrdə seleksiya işi aparmaq üçün müxtəlif tunirlər təşkil olundu. Hazırda isə Bakı və Sumqayıt regionlarından olan 55 gənc istedadla “Dərnəgül Voleybol Mərkəz”ində məşğul oluruq. Həqiqətən də federasiya tərəfindən bu işə böyük dəstək var. Yeni planlar gözlənilir. Biz də çalışırıq ki, Azərbaycanda olan gənc istedadları üzə çıxaraq. İdman gözəl sahədi. Çünki sənin öz ölkəni dünya miqyasında təmsil etmək imkanın olur. Bu da hamıya qismət olmur. Buna görə də qızlarımızı, oğlanlarımızı bu sahəyə dəvət edirik. Həm zal voleyboluna, həm də çimərlik voleyboluna həvəsi olanlar federasiya ilə əlaqə saxlaya bilərlər. Biz heç bir istedadlı uşağın gözdən istməsini istəmirik. Gənc nəsil davamçımızdı. İnşallah, yeni işlərimizlə ölkə voleybolunu yüksək səviyyəyə gətirəcəyik. Biz elə bir ölkədə yaşayırıq ki, dövlət başçısı həmişə ölkə idmanına böyük qayğı göstərir. Bunun nəticəsi kimi idmançılarımız dünya miqyasında bayrağımızı ən yaxşı şəkildə dalğalandırır.

- Azərbaycan xalqının mentallığı fərqlidi. Bəzi ailələr qız övladlarının idmanla məşğul olmasını istəmirlər. Sizin buna münasibətiniz necədi?
- Düşünürəm ki, Azərbaycanda idman sahəsinə maraq böyükdü.Voleybol da ölkəmizdə sevilən peşələrdən biridi. Mən həmişə demişəm ki əvvəlcə uşaqlarda bu sahəyə maraq olmalıdı. İnanıram ki gələcəkdə güclü voleybolçular üzə çıxacaq. Qızlarımızın voleybola sevgisini görürük.

- Ölkə voleybolunun hazırkı durumu sizi qane edirmi?
- Düzdü, son illər Azərbaycan voleybolunda durğunluq oldu. Bunun da müəyyən səbəbləri var idi. Pandemiya ən böyük təsir edən amil idi. Şükürlər olsun, indi hər şey öz yoluna gəlir. Artıq kişi voleybolu ilə də bağlı müəyyən planlar var. Yaxın zamanda bunlar haqda da məlumat veriləcək.

- Voleybol oynadığınız dönəmlə indiki dövrü necə müqayisə edərdiz?
- Hər sahədə olduğu kimi, idmanda da yeniliklər olur. Gənclərimizin də həyata baxışı dəyişir.Onların bir hissəsi müasir texnologiyalara maraq göstərir. Mən özüm də 7 ilə yaxın milli komandada çıxış etmişəm. O zaman Azərbaycan voleybolunun ən parlaq dönəmləri idi. İnanıram ki, yenidən azərbaycanlı voleybolsevərlər uğurlarımızın sevincini yaşayacaqlar.

CAVİD ƏLİYEV