Nəhayət, Harri Keyn arzusuna çatıb. “Tottenhem”in hücumçusunun “Bavariya”ya gözlənilən transferi rəsmiləşib.

“Football-plus.az” xəbər verir ki, Münhen klubunun saytının məlumatında ingilis hücumçu ilə 4 illik müqavilə imzalandığı bildirilib. O, “Bavariya”da “9” nömrəli formada çıxış edəcək. İnsayder Fabritsio Romano Almaniya nəhənginin bu keçid üçün London klubuna 100 milyon avro ödəyəcəyini yazıb. Bu isə Almaniya futbolu tarixində bir oyunçuya görə xərclənən ən böyük məbləğdi.

Qeyd edək ki, İngiltərə millisinin də aparıcı hücumçusu sayılan Harri “Tottenhem”in yetirməsidi. O, bu komanda ilə 317 premyer-liqa oyununa çıxıb və 213 qol vurub. Keynin “Tottenhem”də bütün turnirlərdə 435 oyuna 280 qol vurmaqla sonuncu göstəriciyə əsasən rekord müəyyənləşdirdiyini və oyundaşlarına 64 məhsuldar ötürmə verdiyini də bildirək. Təcrübəli futbolçunun müxtəlif illərdə İngiltərənin “Leyton Orient”, “Milluoll”, “Norviç” və “Lester” klublarında da oynayıb. 30 yaşını iyulun 28-də tamamlayan forvard ilk dəfə legioner həyatı yaşayacaq.

İngiltərə yığmasında 84 oyuna 58 qol vuran Harri “Bavariya”ya keçidini belə dəyərləndirib: “Bavariya” ailəsinin bir hissəsi olduğum üçün çox şadam. Dünyanın ən böyük klublarından biridi. Yarışmaq və ən yüksək səviyyədə çıxış etmək istəyirəm. “Bavariya” qalib mentallığına malikdi, ona görə də indi burda olmaqdan zövq alıram”. Artıq yeni komandasında “Leyptsiq”ə qarşı Almaniya Superkuboku matçında (0:3) debüt edən Keynin bu fikirləri daha maraqlıdı: “Mən bütün həyatımı İngiltərədə, premyer-liqada keçirmişəm. Yeni liqaya və yeni rəqiblərə uyğunlaşmaq lazımdı. Bundesliqada da böyük komandalar var. Hamı “Bavariya”nın çempion olmasını gözləyir, amma “Leyptsiq”lə oyunda da gördüyümüz kimi, rəqiblər güclənir. Təbii ki, getmək qərarını vermək mənim üçün çətin idi. “Tottenhem”də 19 il keçirmişəm, bu klub ürəyimin bir parçasıdı. Hiss etdim ki, vaxt yetişib. Mən kuboklar qazanmaq istəyirəm. “Bavariya” mənimlə əlaqə saxlayanda dərhal hərəkət etmək istədiyimi hiss etdim. Qarşıda uzun bir yol var. Amma Çempionlar Liqasının növbəti finalının “Uembli”yə salınması əladı. Təbii ki, Çempionlar Liqasının qalibi olmaq üçün burdayam”.

Yeri gəlmişkən, Harri klub tarixinin rekorduna imza atıb. “Bild” qəzetinin məlumatına görə, onun transferi açıqlanandan sonra bir gün ərzində “Bavariya”nın mağazalarında 10000-dən çox forması satılıb. Bu isə rekorddu. Başqa sözlə, indiyədək heç bir futbolçu “Bavariya”da belə nəticəyə çatmayıb!

Əlavə edək ki, Keyn tezliklə qısa müddətə vətəninə qayıdacaq. O, Almaniyaya gedərkən London klubundakı oyundaşları ilə vidalaşmayıb.
“The Athletic”in yaydığı məlumatda transfer qəfil reallaşdığı üçün futbolçunun “Tottenhem”in oyunçuları ilə vidalaşmağa vaxt tapmadığı bildirilib. O, özəl təyyarə ilə Münhenə yollanarkən, sadəcə, sabiq klubunu “votsap” qrupuna vida mesajı göndərib. Keyn “ doğma klubundan pis şəkildə ayrılmaq istəmədiyi üçün yaxında normal şəkildə vidalaşmaq məqsədi ilə Londona qayıdacaq.