"Sumqayıt"ın Bolqarıstanın “ÇSKA 1948” klubundan icarə əsasında heyətinə qatdığı brazilyalı yarımmüdafiəçi Oktavio Mantekanın “Football-plus.az” saytına müsahibəsi..

- "Sumqayıt"a keçidin necə alındı?
- Klub prezidenti menecerimlə birlikdə mənə zəng vurmuşdular. Komandanın yeni layihəsini göstərdilər. Bu da məni cəlb etdi.

- Daha əvvəl ölkəmiz və klub haqda məlumatın var idi?
- Xeyr.

- Bir neçə gündü komandayla birlikdəsən. Uyğunlaşa bilirsən?
- Uyğunlaşmaqda çətinlik çəkmirəm. Komanda yoldaşlarım bu məsələdə mənə kömək edir.

- Baş məşqçi Samir Abasovla söhbətiniz olub?
- Meydandan kənarda Samir müəllimlə söhbətimiz olub. O, məşqdə nə edəcəyimi izah edir. Oynamaq üçün məndə özünəinam yaradır.

- Türkiyədəki təlim-məşq toplanışı necə keçdi?
- Hazırlığımız yaxşı keçdi. Komanda yoldaşlarım məşqlərdə mənə kömək edir. İnşallah, yeni mövsümə də uğurlu başlayarıq.

- "Sumqayıt" ötən mövsüm premyer-liqanı 7-ci yerdə bitirib. Səncə, bu komanda yeni “futbol ili”ndə nə edə bilər? Hədəflər nədi?
- Hələ ki indidən nəsə demək tezdi. Bunu zaman göstərəcək. Ümid edirəm ki, çempionatı ilk "4-lük"də bitirib avrokuboklara vəsiqə qazanarıq.

- Son illərdə ölkə çempionatında "Qarabağ" dominantlıq edir. Avrokuboklarda da yaxşı mübarizə aparırlar. Bu komanda barədə məlumatlısan?
- "Qarabağ"ın oyunlarını izləmişəm. Bilirəm ki, ölkə çempionatında ən yaxşı komandalardan biridi. Lakin onları daha dərindən tanımıram.

- Karyerana nəzər salsaq, tez-tez klub dəyişdiyini görürük. Bir komandada möhkəmlənə bilməməyinin səbəbi nədi?
- Düşünürəm ki, zədə olmasaydı, daha yaxşı yerlərdə ola bilərdim. Təəssüf ki, zədələr məni futbolda geri atdı.

- Karyeranda İtaliya 'Fiorentina"sı da olub. Niyə bu komandada qala bilmədin?
- İcarə əsasında "Fiorentina"ya keçəndə 20 yaşım var idi. Çox gözəl heyət formalaşmışdı. Məhəmməd Salah, Mario Qomes, Xoakin Sançes, Aquilino kimi fantastik futbolçular da orda idi. Baş məşqçi Vinçentso Montella mənə ölkə kubokunda oynayacağımı söylədi. Təəssüf ki, zədə buna imkan vermədi. Yanvarda əməliyyat olundum və meydana çıxa bilmədim. Bundan sonra müqavilə ilə məxsus olduğum "Botafoqo"ya qayıtdım.

- "Sumqayıt" azarkeşlərinə nə demək istərdin?
- Əvvəlcə bu kluba keçidimi sosial şəbəkələrdə yaxşı qarşıladıqları üçün təşəkkür edirəm. Onların dəstəyi ilə bu mövsüm yaxşı yerlər uğrunda mübarizə aparacağıq.

CAVİD ƏLİYEV