Belarusun paytaxtı Minskdə təşkil olunan 2-сi Müstəqil Dövlətlər Birliyi (MDB) oyunlarında iştirak edən 19 yaşadək futzal millimiz 3 matç keçirib.

"Football-plus.az" xəbər verir ki, ilk oyun bazar ertəsi baş tutub. Belaruslu həmyaşıdlarla görüş rəqibin böyükhesablı qələbəsi ilə yekunlaşıb – 7:1. U-19-un heyətində Qüdrət Qasımzadə fərqlənib. İlk oyunda millimizin heyətində bu futzalçılar yer alıb:

1. Əli Quliyev, 10 Fərid Abbasov (k), 5. İlham Əliyev, 3. Qüdrət Qasımzadə, 7. Şahbaz Həmdəmli; 12. Sadiq Əlizadə, 14. Kərim Babayev, 2. Rüfət Məmmədli, 12. Sunay Həsənov, 11. Orxan Babayev, 9. Nüsrət Fərzəli, 6. Ayxan Məmmədli, 8. Bəyoğlan Vəlizadə, 4. Elşən Mahmudov.

Yığma avqustun 8-də Qırğızıstan U-19-u ilə qarşılaşıb. Bizimkilər ilk dəqiqələrdə inamlı çıxış edib. Hesabı açan futzalçılarımız fasiləyə qədər daha bir qol vursa da, üstünlüyü qoruya bilməyib. Tərəflər paltardəyişmə otağına 2:2 hesablı heç-heçə ilə yollanıb. Komandamızın qollarını Rüfət Məmmədli və Fərid Abbasov vurub. İkinci hissədə rəqib daha üstün olub və 3 cavabsız qol vurub. Yekunda matç qırğızların 5:2 hesablı qələbəsi ilə yekunlaşıb.
İkinci oyunda millinin heyətində bu futzalçılar yer alıb:

12. Sadiq Əlizadə, 10 Fərid Abbasov (k), 5. İlham Əliyev, 3. Qüdrət Qasımzadə, 7. Şahbaz Həmdəmli; 1. Əli Quliyev, 14. Kərim Babayev, 2. Rüfət Məmmədli, 12. Sunay Həsənov, 11. Orxan Babayev, 9. Nüsrət Fərzəli, 6. Ayxan Məmmədli, 8. Bəyoğlan Vəlizadə, 4. Elşən Mahmudov

Üçüncü görüş isə dünən Özbəkistanla olub. Qarşılaşma rəqibin 9:1 hesablı qələbəsi ilə başa çatıb. U-19-un yeganə qolunu Bəyoğlan Vəlizadə vurub.
Dünənki oyunda millinin heyətində bu futzalçılar yer alıb:

12. Sadiq Əlizadə, 10 Fərid Abbasov (k), 5. İlham Əliyev, 3. Qüdrət Qasımzadə, 7. Şahbaz Həmdəmli; 1. Əli Quliyev, 14. Kərim Babayev, 2. Rüfət Məmmədli, 12. Sunay Həsənov, 11. Orxan Babayev, 9. Nüsrət Fərzəli, 6. Ayxan Məmmədli, 8. Bəyoğlan Vəlizadə, 4. Elşən Mahmudov.

Yığmanın baş məşqçisi İlqar Aslanov ilk iki görüşlə bağlı Futzal Federasiyasının saytına bunları deyib: “Meydan sahiblərinə qarşı oynamaq həmişə çətin olur. Üstəlik rəqiblər çox güclü idi. Futzalçılarımızın bir neçəsi ilk dəfə belə yarışda iştirak etdiklərinə görə həyəcanlı idilər. Qapıçılar da ümidləri doğrultmadı. Bir qədər inamlı oynasaydılar, hesabdakı fərq böyük olmazdı. Futzalçılar bu cür yarışlarda “bişirlər”. Turnir təcrübə toplamaq baxımından faydalı olacaq. Yüksək liqada mövsüm başa çatandan sonra, demək olar ki, oyun keçirməmişdik. Bu hər iki matçda hiss olundu. Rəqiblərimiz isə əksinə, turnirə yaxşı hazırlaşıb. Heç-heçə etmək, hətta qələbə qazanmaq imkanı var idi. Ancaq oyun təcrübəsinin azlığı, bəzi futzalçıların ilk dəfə belə yarışa qatılması sözünü dedi. Üstəlik ardıcıl iki gün meydana çıxmaq da çətinlik yaratdı”.

Bizimkilərin turnirdə sonuncu oyunu avqustun 11-də Rusiya ilə olacaq. Allah betərindən saxlasın!

KƏNAN BAHADIR