İngiltərədə futbol mövsümü ənənəvi olaraq Superkubok uğrunda oyunla başladı.

"Football-plus.az" xəbər verir ki, titul uğrunda oyunda “Mançester Siti” ilə “Arsenal” üz-üzə gəldi. Xatırladaq ki, buna qədər komandalar 211 dəfə qarşılaşmış, bunların 208-i ölkədaxili turnirlərə, o cümlədən Superkuboka təsadüf etmişdi. Superkubok uğrunda keçirilən hər iki oyundan “topçular” qalib ayrılmışdı (1934, 2014), özü də darmadağınla – 3:9, 4:0. Ötən mövsüm isə “Siti” “Arsenal”ı iki dəfə ölkə çempionatında, bir dəfə ölkə kubokunda məğlub etmişdi.Sözsüz, “şəhərlilər” favorit sayılırdı. Ən azı ona görə ki, Qvardiolanın komandası son mövsümü trebllə bitirmişdi. Ancaq londonluların da əks dəlilləri var idi. Söhbət ilk növbədə çox keyfiyyətli transfer kampaniyasından gedir. Oyunun axarına gəlincə, ilk yarının ortalarına qədər qol vəziyyəti görmədik – “Sit”i topa və ərazi üstünlüyünə yiyələnsə də, Remsdeyli oyuna qoşulmağa məcbur edə bilmirdi. Uzaqbaşı bir neçə uzaqdan zərbəni xatırlamaq olar. İntizamla müdafiə olunan “Arsenal” tədricən təşəbbüsü ələ keçirməyə başladı. Və təhlükəli vəziyyətləri də çox gözləmək lazım gəlmədi. Haverts iki gözəl şansı qaçırdı, onun zərbələrinin öhdəsindən Orteqa gəldi. Qvardiola 2-ci hissənin ortalarında Foden, De Bruyne və Palmeri meydana buraxmaqla meydandakı mənzərəni dəyişdi. Bernardo Silva isə dayaq zonasına – Rodrinin yanına çəkildi. Məhz oyuna sonradan qoşulanlar ilk qolu yaratdı. Foden topu meydanın rəqibə aid hissəsinə daşıdı, həmin hücumun 2-ci dalğasında De Bruynedən ötürmə alan Palmer sol güncə gözəl zərbə vurdu. Tezliklə “Siti” iki dəfə fərqi artırmağa yaxın oldu, ancaq Remsdeyl Fodenlə Rodrinin təhlükəli zərbələrinin öhdəsindən gəldi. Attuell 2-ci hissəyə 8 dəqiqə artırsa da, komandalar uzun fasilə üzündən bundan artıq oynadı. 11-cu uzatma dəqiqəsində “topçular” Trossarın sayəsində “şəhərlilər”in qapısına yol tapdı. Belədə komandalar qalibi penalti seriyasında müəyyənləşdirməli oldu. “Lotereya”da “Arsenal” fərqləndi – 4 oyunçunun hər biri zərbəni dəqiq yerinə yetirdisə, “Siti”dən De Bruyne ilə Rodri imkanı boşa verdi.

Mançester Siti – Arsenal 1:1, p. – 1:4
Mançester Siti: Orteqa, Uoker, Stounz, Diaş, Akanci, Rodri, Kovaçiç (De Bruyne, 64), B.Silva, Alvares, Qriliş (Foden, 58), Holann (Palmer, 64).Arsenal: Remsdeyl, Uayt, Saliba, Qabriel (Smit-Rou, 87), Timber (Tirni, 76), Edeqor, Parti, Rays (Nketia, 81), Saka, Haverts (Vieyra, 87), Martinelli (Trossar, 75).
Qollar: Palmer, 77 (1:0). Trossar, 90+11 (1:1).
Penalti seriyası: Edeqor – 0:1. De Bruyne – 0:1 (tir). Trossar – 0:2. B.Silva – 1:2. Saka – 1:3. Rodri – 1:3 (qapıçı). Vieyra – 1:4.
Vərəqələr: Parti, 8. Haverts, 27. Alvares, 31. Qabriel, 66 – sarı.
Hakim: Stüart Attuell.
6 avqust. London. “Uembli” stadionu. 81145 tamaşaçı.

Oyundan sonra
Mikel Arteta, “Arsenal”ın baş məşqçisi: “Gözəl anlardı. Çətin ki, “Uembli”də dünyanın ən yaxşı komandasını məğlub etməkdən yaxşı hadisə ola. Əla qol imkanlarımız var idi, xüsusən də ilk yarıda. Hamı bilir ki, belə imkanları boşa verməyin axırı necə olur. Meydanın mərkəzində kiçik səhvə yol verdik, topu çıxarmadıq, bir saniyə sonra isə onu qapı torundan çıxardıq. Bundan sonra çox çətin oldu. Ancaq biz düzgün qərarlar verdik, dəyişikliklər etdik, oyun sxemini dəyişdik, hesabı bərabərləşdirdik, ardından penalti seriyasında qalib gəldik. Futbol belədi: bu gün titul qazanırsan, sabah isə artıq “Nottingem Forest”lə oyuna hazırlaşmalısan. Addım-addım irəli getməli olduğumuzu bilirik. Qələbə yaxşıdı, komandanı ruhlandırır, inam bəxş edir. Biz, sadəcə, yaxşı oynamaq və qələbələr qazanmaq istəyirik”.

Pep Qvardiola, MS-nin baş məşqçisi: “Uduzub-udmağımızdan asılı olmayaraq, mən indi komandamın hansı vəziyyətdə olduğunu bilirəm. Əvvəlcə bərpa olunmalı və “Bernli” ilə oyuna hazırlaşmalı, ardından Afinaya uçmalı, axşam saat 10-da oynamalı, gecə saat 2-də bitirməli, dönməli və şənbə gün evdə “Nyukasl” ilə qarşılaşmalıyıq. Plan belədi. Birmənalı şəkildə bu gün qalib gəlmək istəyərdik, ancaq bəzən məğlubiyyəti qəbul etmək və rəqibin haqqını vermək lazımdı. Qeyri-adi dərəcədə gərgin mövsümü bitirdik, oyunçular yığmalarının düşərgəsinə yollandılar və bəlkə də heç üç həftə dincəlmədilər. Toplaşdıq, bir qədər Mançesterdə məşq etdik, sonra Asiyaya uçduq ki, orda da məşq etmək mümkünsüzdü. “Bavariya”ya qarşı heç də pis oynamadıq, daha iki oyun keçirdik. Yaxınlarda məzuniyyətdən qayıtdığımızı nəzərə alsaq, çox yaxşı təsir bağışladıq. Uşaqların hələ də işə kökləndiyini gördüm, odu ki, gileylənəsi nəsə yoxdu. Psixoloji cəhətdən artırmaq və birgə qələbələrdən sonra daha yaxşı oynamağa qadir olduğumuzu anlamaq – hədəfimiz budu”.

Faktlar
* Arteta məşqçi karyerasında ikinci dəfə İngiltərə Superkubokunu qazandı. 2019-cu ilin dekabrından “topçular”ı çalışdıran ispaniyalı ilk dəfə bunu 2020-ci ildə bacarmışdı. Artetanın bu komandanın “sükanı arxasında” üç titulu var. 2019/20 mövsümündə də ölkə kubokunu qazanıb.
* “Arsenal” Superkubok oyunlarında qələbə sayına görə təmiz 2-ci yerə çıxdı. “Topçular” ümumilikdə 17 dəfə bu titulu qazanıb. Onlar “Liverpul”dan (16) uzaqlaşdılar və yalnız “Mançester Yunayted”dən (21) geri qalırlar.
* “Mançester Siti” ardıcıl üçüncü dəfə Superkubok uğrunda oyunda uduzdu. “Şəhərlilər” 2021-də “Lester”ə (0:1), ötən il isə “Liverpul”a (1:3) boyun əymişdilər.
* Qvardiola məşqçi karyerasında 2-ci dəfə Artetaya uduzdu. Arteta “sükan arxasına” keçəndən bəri bu mütəxəssislər 10 dəfə qarşılaşıb. Qvardiola 8 qələbə qazanıbsa, rəqibinin 2 qələbəsi var. Artetanın komandası buna qədər Qvardiolanın komandasını sonuncu dəfə 2020-ci il iyulun 18-də ölkə kubokunun yarımfinalına məğlub etmiş, ardından 7 oyunda uduzmuşdu. Həmin oyunlarda top fərqi 21:4 idi.
* Holann MS-nin heyətində keçirdiyi ardıcıl 6-cı oyunda fərqlənə bilmədi. 64-cü dəqiqədə əvəzlənən 23 yaşlı norveçli hücumçu heç bir məhsuldar hərəkətlə yadda qalmadı. “Siti”nin heyətində ardıcıl 6-cı rəsmi oyunda fərqlənməyən Holann sonuncu dəfə mayın 14-də “Everton”un (3:0) qapısına yol tapıb.
* Holann bu oyunda cəmi 13 dəfə topa toxuna bildi. Bu isə meydana çıxan bütün oyunçular arasında ən aşağı göstəricidi. Forvard rəqibin cərimə meydançasında bir dəfə də topa yiyələnmədi, əvəzində 7 dəfə meydanın komandasına aid hissəsində top onda oldu. Norveçli həmçinin “Arsenal”ın qapısına bir zərbə də vurmadı.