“Football-plus.az” xəbər verir ki, qadın voleybolçulardan ibarət yığmamız Avropa çempionatına hazırlığı davam etdirir.

Bakıda davam edən toplanış barədə yığmanın blokçusu Aynur İmanova ilə söhbətləşdik.

- Komanda Bakıda hazırlıq keçdikdən sonra Bosniya və Hersoqovinaya getdi. Birhəftəlik toplanışdan sonra yenidən vətənə döndüz. Təlim-məşq toplanışı barədə ümumi məlumat verərdin.
- Artıq ayyarımdı toplanış keçirik. Məşqçimiz özü də demişdi ki, bu zaman ərzində komandada eniş də olacaq. Bosniya və Hersoqovina yığması ilə üç yoxlama oyununda qüvvəmizi sınadıq. Daha sonra Bakıya qayıtdıq. Burda da Belarus seçməsi ilə oyunlarımız var. Ümumi dəyərləndirsək, pis hazırlıq keçmədik.

- Hansı mövqelərdə problemlər var?
- Ən çox blokda çətinlik çəkirik. Baş məşqçimiz bunun üzərində işləyir.

- Avqustun 15-də Avropa çempionatı start götürür. Turnirdən gözləntilərin nədi?
- Artıq 10-cu dəfə bu turnirdə iştirak edəcəyik. Məqsədimiz Azərbayacana nəticə ilə qayıtmaqdı. İnşallah, bu məqsədə çatarıq.

- Qrupdakı rəqibləriniz Çexiya, Almaniya, Türkiyə, Yunanıstan və İsveç yığmalarıdı. Ən çətini hansıdı?
- Hansı rəqibin zəif və ya güclü olduğunu deyə bilmərəm. Biz meydana çıxıb öz oyunumuzu göstərməyə çalışacağıq. Qrupdan lider kimi çıxmaq istəyirik.

- Federasiya prezidenti Şahin Bağırov yığma komanda ilə görüş keçirdi. Nədən söhbət getdi, hansısa yenilik olacaqmı?
- Şahin müəllim məşqə gəldi, komandamıza uğurlar arzuladı. O da çalışacaq ki, Avropa çempionatında bizlə birgə olsun. Yenilik barədə nəsə demədi. Çox sağ olsun ki, bizdən dəstəyini heç vaxt əsirgəmir.

- Azərbaycan voleybolunun hazırkı durumu ürəkaçandımı? Əvvəlki illərdə güclü voleybolçular ölkə çempionatında çıxış edirdi. İndi isə hər şey fərqlidi...
- Son üç ildə ölkə çempionatı əvvəlki səviyyəsindən uzaqdı. Əvvələr əcnəbi voleybolçular çempionatımıza maraq göstərirdilər. İndi isə maliyyə problemləri olduğu üçün bir çox şey etmək olmur. Altı komandayla mübarizə aparırıq. Legionerlər də cəlb olunub. İnşallah, durum düzələr. Bunun üçün yaxşı sponsorlar olmalıdı. Çünki klublarımıza maliyyə çox vacibdi. Yaxşı legionerlər gətirilməlidi. İstərdim ki, azərbaycanlı qızlarda da voleybola marağı artıraq, onlarla daha çox işləyək.

- "Azərreyl"də işlərin necə gedir?
- "Azərreyl"də vəziyyətim yaxşıdı. Amma gələcəkdə nələrin baş verəcəyini zaman göstərəcək. İndi bütün fikrimi milli komandaya yönəltmişəm.

- Heç vaxt legioner həyatı yaşamamısan. İndiyə kimi təklif olmayıb, yoxsa özün istəməmisən?
- İstəyərdim ki, mən də Avropada çıxış edim. Təkliflər də olub. Bunu etmədiyimə görə peşmanam.

- Ailəvi səbəblər qarşını kəsdi?
- Əvvələr ailə məsələsinə görə deyildi. Öz ağılsızlığım ucbatından gedə bilmədim. İndi isə 3 yaşında qızım var. Buna görə də xaricə getmək alınmır.

- Bəzi azərbaycanlı voleybolçular özünü çimərlik voleybolunda da sınayır. Sənin belə fikrin olub?
- Mənim mövqeyim blokçu olduğu üçün çimərlik voleybolunda çıxış edə bilmərəm. Çünki orda qısa toplar və qəbullar var. 4-cü və 2-ci zona oyunçuları üçün bu idman növü daha rahat olar.

- Bu idman növü ilə məşğul olmaq istəyən, lakin qarşısında müəyyən maneələr olan qızlara nəyi tövsiyə edərdin?
- Həvəsləri varsa, valideynləri onlara şərait yaratsınlar. Ən azı yoxlasınlar.

CAVİD ƏLİYEV