Peşəkar karyerasına 2008-ci ildə "Azerreyl"də başlayan qadın voleybolçulardan ibarət yığmanın üzvü Ayşən Abduləzimova 2018-dən legoner həyatı yaşayır. 2018 -20 aralığında Macarıstanda “Vaşaş”da, 2020/21 mövsümündə Türkiyədə "Sarıyer Bələdiyəspor"da çıxış edən blokçu 2021-ci ildən yenidən "Vaşaş"ın uğurları üçün çalışır. Dünən 30 yaşlı idmançı ilə yığmanın Avropa çempionatına hazırlığı, karyerası, ölkə voleybolu haqda söhbətləşdik.

- Hazırlıq necə gedir?
- Hazırlığı Bosniya və Hersoqovinada davam etdiririk. Bu ölkənin yığması ilə 3 yoldaşlıq oyunu keçirmək planlaşdırılıb. Artıq dünən rəqibimizlə birinci matçımızı keçirdik və heç-heçə etdik - 2:2.

- Komandanın heyətində itkilər var?
- Kollektivdə hər şey qaydasındadı. Təlim-məşq toplanışını geniş heyətlə keçirik.

- Avqustun 15-də Avropa çempionatı start götürür. Bu turnirdən gözləntilərin nədi?
- Əsas məqsəd qrupu ilk pillələrdə başa vurmaqdı. Bunu bacarsaq, növbəti mərhələdə bizə rahat olacaq.

- Almaniya, Türkiyə, Çexiya, Yunanıstan və İsveçlə eyni qrupda mübarizə aparacaqsız. Rəqibləri necə dəyərləndirərdin?
- Rəqiblərimiz güclü olsa da, şansımız çoxdu. Əlimizdən gələnin ən yaxşısını edib qrupdan çıxacağıq.

- Millinin sabiq və hazrkı baş məşqçilərini müqayisə edə bilərsən?
- Bu sualı cavablamasam, daha yaxşı olar.

- Polina Rəhimova üç ildən sonra yenidən qitə birinciliyində yığmamızın heyətində çıxış edəcək. Onun qayıdışı millinin oyununa necə təsir edəcək?
- Polina güclü voleybolçudu. Onun qayıdışı bizə əlavə güc verəcək.

- "Vaşaş"da legioner həyatın necə keçir? Bu illər ərzində hansısa çətinliklə üzləşmisən?
- Artıq 5 ildi Macarıstandayam. Hər il fərqli çətinliklər olur. Mövsüm ərzində çoxlu oyun keçirməyimiz fiziki və psixoloji cəhətdən yorulmağımızla nəticələnir. Lakin bu, işimizin bir parçasıdı.

- Ötən il Macarıstanda ən yaxşı oyunçu seçilmisən. Bununla bağlı təəssüratınızı bölüşərdin...
- Açığı, bunu gözləmirdim. Mən titul və ad üçün oynamıram. Amma məni buna layiq gördüklərinə görə xoşbəxtəm. İnşallah, davamı gələr.

- Yığmadakı və klubdakı gələcək hədəflərin nədi?
- Hədəf yaxşı oyun göstərməkdi. Ən əsas da milli komanda ilə. Çünki son illər yığmanın heyətində yaxşı nəticə göstərə bilmirik.

- Transfer təklifləri olub?
- Bəli, bir neçə ölkədən təkliflər olub. Lakin Macarıstan və "Vaşaş" mənim ikinci evimdi. Baş məşqçimizlə münasibətim də çox yaxşıdı. Özümü burda xoşbəxt hiss edirəm.

- Xaricdə oynayan idmançı kimi ölkə voleybolunun səviyyəsini necə qiymətləndirirsən?
- Düzü, 5-6 il əvvəllə müqayisə etsək, hazırda ölkə çempionatının səviyyəsi aşağıdı. Yüksək liqada çıxış edən komandaların sayı azdı. İstəyirəm ki, ölkə çempionatında oynadığım zaman olan klublar yenidən əvvəlki gücdə olsunlar.

- Ölkə voleybolunun əvvəlki nüfuzunu necə geri qaytarmaq olar?
- Bunun üçün klubların və sponsorların sayı artmalıdı. Mən Azərbaycanda çıxış etdiyim dövrdə ən güclü voleybolçular bizim çempionatda idi. Liqamız dünyada, Avropada izlənilirdi. İnanıram ki, yeni rəhbərliklə voleybolumuz əvvəlki nüfuzunu pillə-pillə bərpa edəcək.

CAVİD ƏLİYEV