"Neftçi"də hərəkətlilik davam edir.

"Football-plus.az" xəbər verir ki, hazırda klubun prezidenti Kamran Quliyevin postundan göndərilməsi gündəmdədi. Onu Basketbol Federasiyasının vitse-prezidenti Fərrux Məmmədovun əvəzləyəcəyi bildirilir. Məsələ ilə bağlı redaksiyamıza maraqlı informasiya daxil olub. Gec-tez "Neftçi"də qaranlıq məqamlara aydınlıq gələcək. Lakin hazırda Kamran Quliyev de-fakto "Neftçi"nin rəhbəri deyil. Hazırda onun funksiyalarını menecer Kamil Məmmədov icra edir. Adı çəkilən şəxs dünən komandanın Bakı Olimpiya Stadionundakı məşqində də iştirak edib. Adrian Mutu və yerli futbolçularla söhbət edən Kamil bəy ümumi durumla maraqlanıb.

Redaksiyamıza daxil olan məlumata görə, Muşahidə Şurası, ümumiyyətlə, prezident postunu ləğv etməyi düşünür. "Neftçi"də icraçı direktor vəzifəsi yaradılacaq və birbaşa Rövşən Nəcəfin başçılıq etdiyi şuraya tabe olacaq. Yeni posta yeganə namizəd isə Kamil Məmmədovdu.

Hazırda "Neftçi" rəhbərliyində yer alan şəxslər belə öz aqibətlərinin necə olacağını bilmirlər. Bütün məsələlərə Konfrans Liqasının 2-ci təsnifat mərhələsinin "Jelezniçar"la oyunundan öncə aydınlıq gələcək.

İLKİN SULTANLI