"Hazırda "Neftçi" haqda xoş sözlər demək mümkün deyil. Zəngin tarixi olan klubun vəziyyəti hər bir azarkeşi narahat etməyə bilməz. Əfsuslar olsun ki, durum çox kritikdi. Bundan sonra hansısa irəliləyişdən danışmaq olmur. Xüsusən də yeni baş məşqçi təyinatı ilə bağlı gözləntilər faydasızdı. Çox gecikiblər. Bildiyim qədər komanda məşq edir. Amma baş məşqçisiz çalışmağın futbolçulara nə qədər faydalı olacağı sual altındadl. Oyun tərzi, birlik və düzgün istiqamətdə idarəetmə olmadıqdan sonra hansısa hazırlıqdan söhbət gedə bilməz.

"Matç TV" kubokunun başlamasına 3-4 gün qalıb. Mənim nailiyyət qazanacağımıza inamım yoxdu. Ümumiyyətlə, "Neftçi"nin bu turnirə qatılması tam yersizdi. Hazırlıq xarakterlidisə, elə Bakıda normal baş məşqçinin himayəsində məşq etmək komandaya daha yaxşı təsir göstərərdi.

Konfrans Liqasının oyunlarına da 1 ay qalıb. Tutaq ki, yeni çalışdırıcı gəldi. Qısa müddətdə nə edə biləcək? Heyətin komplektləşdirilməsi və elə vacib matçlara hazırlığın tamamlanması üçün daha çox vaxt lazımdı. Ən əsası, klub rəhbərliyi baş məşqçinin qarşısına hansı haqla tələb qoyacaq? Öyrəşmişik ki, "Neftçi" çempionluq uğrunda mübarizə aparsın, avrokuboklarda qələbələr qazansın. Deyəsən, hələ o günləri çox gözləyəcəyik. Buna baxmayaraq, "ağ-qaralar"a uğurlar arzu edirəm.

Belə məsələlərdə "Neftçi" haqda tənqidi cümlələr qurduğuma görə məni qınayırlar. Halbuki klubun nailiyyətlərinin şahidi olmaq istəyənlərdən biri də mənəm. İnşallah, bu günlər geridə qalar".