"Neftçi" çətin dövrdən keçir. Belə anlardan üzüağ çıxa bilmək üçün peşəkarlıq yüksək səviyyədə olmalıdı. Təəssüf ki, bunu görmürük. Baş məşqçi ilə yolları ayıran klub ən azı 2-3 ay əvvəldən bu yöndə axtarışlara başlamalı idi. Hazırda futbolçuların əksəriyyəti çaş-baş qalıb. Heç kim əmin deyil ki, yeni baş məşqçi gələndə onu heyətdə saxlayacaq, ya yox? Çünki "Neftçi"nin ötən mövsüm əldə etdiyi nəticələr ortadadı. Hər halda, yeni çalışdırıcı dəyişikliklərə ehtiyac duyacaq.

"Ağ-qaralar"ı qarşıda vacib oyunlar gözləyir. Məncə, həmin qarşılaşmalar elə də çətin keçməyəcək. "Neftçi" ən zəif vaxtlarında belə uğur qazana biləcək komandadı. "Matç TV" kubokunda da, Konfrans Liqasının ilk matçında da qələbə qazanmaq ehtimalı çoxdu. Lakin bu rəhbərliyin məsuliyyətini azaltmamalıdı. O vaxta qədər yeni baş məşqçi təyin olunmalıdı. Çünki xüsusən Konfrans Liqasındakı rəqiblər getdikcə çətinləşəcək. Digər tərəfdən, premyer-liqa klubları növbəti mövsümə çox ciddi hazırlaşır. Xeyirlisi. Ümid edək ki, "Neftçi" bu vəziyyətdən tez xilas olacaq".