"İki maraqlı və baxımlı matç keçirdik. Turnirin məqsədlərinə uyğun ilkin hədəfimiz futbolçuların formaya düşməsi və təcrübələrini zənginləşdirmək idi. Düzdü, belə qarşılaşmalarda nəticə o qədər də vacib olmur. Buna baxmayaraq, qələbə qazansaydıq, daha yaxşı olardı.

Bilindiyi kimi, qarşıda bizi Avropa çempionatının seçmə mərhələ oyunları gözləyir. Qələbə komandada əlavə motivasiya və inam yarada bilərdi. Təəssüf ki, olmadı. Məyusuq. Onu da vurğulayım ki, Veysəl Rzayev (Turan Tovuz), Abdulla Rzayev (Kəpəz) və Nazim Həsənzadə (“Dauqavpils”, Latviya) zədə səbəbindən heyətdə yer almamışdı. Yəni komandada ölkə çempionatında təcrübəsi olan az sayda futbolçu var idi ki, onların da xidmətindən yararlanmaq qismət olmadı. Ümumiyyətlə, futbolçularda yorğunluq hiss olunurdu. Oyunlara gəlincə, heç kimə sirr deyil ki, indiki halda Türkiyə yığması bizdən 2-3 addım öndədi. Bunu komandanın digər güclü rəqiblərlə qarşılaşmalarına nəzər saldıqda görürük. Türkiyə yaxın tarixdə həqiqətən ciddi uğurlara imza atıb və böyükhesablı qələbələr qazanıb. Rəqibin güclü olmasına baxmayaraq, çox yaxşı mübarizə apardıq, bir neçə qol vəziyyəti yaratdıq. Ustalıq səviyyəsi çatmadı ki, yaratdığımız imkanları qola çevirək. Təəssüf ki, sadə səhvdən qapımıza penalti təyin olundu. 11 metrlik cərimə zərbəsinin qola çevrilməsindən sonra işlər yolunda getmədi. Nəticədə məğlub olduq.

Qırğızıstanla oyun da istədiyimiz kimi alınmadı. Bu matçdan ümidliydim. Düşünürdüm ki, qələbə qazana bilərik. Çünki futbolçularımda güc və inam hiss edirdim. Sona qədər əzmlə mübarizə apardılar. Bir var, “döyüşmədən” təslim olursan, bir də var, qələbə üçün meydanda can qoyursan. Milli komandamızda ilk dediyim hal yaşana bilməz. Mən yeni oyunçular seçərkən xüsusilə bu mövzuda çox diqqətli davranıram. Yığmanın məsuliyyətini dərk etməyən, ağır yükün altına girməkdən çəkindiyini hiss etdiyim oyunçularla dərhal danışığı yekunlaşdırıram. Digər tərəfdən, hər iki qarşılaşmada yeni sistem üzərində işlədik, bir çox oyunçuya şans verdik. 5 futbolçu U-21-də debüt etdi. Hər iki matç göstərdi ki, ümid yeri var. Təbii ki, inkişaf etmək üçün daha çox çalışmalıyıq. Çətin rəqiblərlə oynamağımızın səbəbi budu. Gücümüzə bələd olmaq vacibdi. Qazandığımız təcrübə Avropa çempionatının matçlarında bizə kömək edəcək. Məşqçilər korpusu olaraq, qarşıdakı günlərdə soyuq başla hər iki oyunu təhlil edəcəyik. Ümumilikdə komandamdan razı qaldım”.

“Ümumi vəziyyətə gəlincə, bu haqda çox danışmaq olar. Birincisi odu ki, ölkədə keyfiyyətli futbolçu qıtlığı var. Elə gerçəkdi ki, bunu gizlətmək olmaz. Futbola həvəsi olan yeniyetmələrin sayı çox olsa da, tapşırıqlara əməl etməyə, meydanda prinsipial oyun nümayiş etdirməyə gələndə, özlərini yaxşı tərəfdən göstərə bilmirlər. İkincisi, matçların canlı yayınlanmamasıdı. Çox istərdik ki, azarkeşlər televiziyalarda belə oyunları izləsin. Bəzən nəticə yaxşı olmayanda elə sözlər eşidirik ki, sanki faciə baş verib. Əksəriyyətin komandanın meydanda nə qədər inamlı mübarizə aparmasından xəbəri olmur. Həqiqətən elə hallar baş verir ki, millimiz nə qədər istəsə, əlindən gələni etsə də, rəqib reallığı dəyişməyə imkan vermir. Bizə isə acınacaqlı vəziyyətlə barışmaq qalır. Sonda deyim ki, bundan sonra başqa təlim-məşq toplanışı hələ ki nəzərdə tutulmayıb. İndiyə qədər Macarıstan, Albaniya və İsveç kimi rəqiblərlə də oyunlar keçirmişik. Avropa çempionatının seçmə mərhələsində ən yaxşısını etməyə çalışacağıq”.