“Bank Respublika Arena” iyunun sonuna kimi hazır olacaq
Mövsümü mükafatçılar sırasında bitirən klublardan biri də "Sabah"dı.
Masazır təmsilçisi tarixində ilk dəfə gümüş medalları təmin etməklə avrokuboka vəsiqə qazandı. Klubun qida sponsoru “Scalini” mövsümün yekunu ilə bağlı komanda üçün ziyafət təşkil edib. Ziyafətdə “Sabah”ın rəhbərliyi, məşqçiləri, texniki heyəti və futbolçuları iştirak edib. Bəzi futbolçulara klub tərəfindən xüsusi mükafatlar təqdim olunub.
Yeri gəlmişkən, komandanın ev oyunlarını keçirdiyi “Bank Respublika Arena”da yenidənqurma işləri davam edir. İşlər tamamlanandan sonra isə UEFA baxış keçirəcək. Bu yöndə son məlumatları klubun mətbuat katibi Elnur Həmidovdan aldıq:
"Stadionda işlər öz axarıyla davam edir. Komandamızın avrokuboklarda ev oyunlarını "Bank Respublika Arena"da keçirə bilməsi üçün bütün çatışmazlıqlar aradan qaldırılır. İşlərin bu ayın sonuna kimi bitməsi planlaşdırılır. Tələb olunan meyarla üzrə işlər yekunlaşandan sonra stadiona baxış olacaq və yekun qərar veriləcək. Futbolçulara gəlincə, əksəriyyətinin klubla müqaviləsi var. Müqavilə müddəti başa çatanlarla bağlı məsələyə isə yaxın günlərdə aydınlıq gələcək".
Bu arada “Sabah” Abdulaye Ba ilə vidalaşıb. 32 yaşlı müdafiəçi sosial şəbəkədəki hesabında "bayquşlar"dan ayrılması haqqda bunları qeyd edib: "Sabah"la müqaviləmin müddəti başa çatıb, bu komandada oynamaq çox özəl idi. Xüsusi təcrübə oldu. Evdəymişəm kimi hər oyunda vacib olduğumu hiss etdirdiz, azarkeşlər böyük dəstək verdi. Kluba təşəkkür edirəm, hər birinizdən öyrəndiklərim oldu. Həmişə qəlbimdə olacaqsız".
Xatırladaq ki, Ba 2022-ci ilin iyulundan "Sabah"da çıxış edirdi. O, premyer-liqada 22 oyuna 2 qol vurub.
ABDULLA İSMAYILOĞLU
Digər xəbərlər
