Mövsümün yarıdan çoxu geridə qaldığından artıq premyer-liqa təmsilçiləri avrokuboklarla bağlı seçimlərini edir. Daha dəqiq desək, qitəmiqyaslı turnirə vəsiqə qazanacağı halda rəqibləri hansı stadionda qəbul edəcəklərini müəyyənləşdirirlər.

“Qarabağ”, “Sabah” və “Neftçi”nin yayda beynəlxalq arenada çıxış edəcəyinə az adam şübhə edir. 4-cü komandanın adı isə iyunun 3-də məlum olacaq. Ya ölkə kubokunun qalibi, ya da 4-cü pillənin sahibi Avropaya gedən qatarın sonuncu sakini olacaq.

Ağdam təmsilçisi, hər il olduğu kimi, bu yay da rəqiblərini “Tofiq Bəhramov”da qonaq edəcək. “Neftçi” “Bakcell Arena”nı sifariş edib. “Sabah”ın məsələsi isə bir qədər fərqlidi. “Bayquşlar” çempionat oyunlarını Masazaırdakı “Bank Respublika Arena”da keçirsə də, mətbuatda yazılanlara inansaq, avrokubok üçün “Dalğa Arena”nı sifariş edib.

Məsələ ilə bağlı “Football-plus.az”a danışan klubun mətbuat katibi Elnur Həmidov hələ yekun qərarın verilmədiyini bildirdi:

“Komandamız premyer-liqaya vəsiqə qazandığı 2018-ci ildən “Bank Respublika Arena”nın xidmətindən istifadə edir. Cari mövsümdə avrokuboklara vəsiqə qazansaq, çox istərdik ki, oyunlarımızı məhz bu arenada keçirək. Ancaq bildiyiniz kimi, UEFA-nın qitəmiqyaslı oyunları qəbul edəcək stadionlar üçün müəyyən kriteriyaları var. Bu şərtlərə cavab verməyən arenalara avrokubok matçları keçirməyə icazə verilmir. Lakin “Bank Respublika Arena”nın avrokubok üçün sifariş edilməsi hələ ki gündəmimizdədi. Bu mümkün olmasa, Bakıdakı başqa stadionların birini sifariş edəcəyik”.

RƏŞAD