Atası istəməsə də, hakimliyə üz tutdu - AÇIQLAMA
Premyer-liqanın 35-ci turunun “Kəpəz” – “Neftçi” oyununda daha bir hakim elitada debüt etdi.
Söhbət Kamran Əliyevdən gedir. “Football-plus.az” xəbər verir ki, Qəbələdə keçirilən görüşdə gənc hakim heç də pis təsir bağışlamadı. Müəyyən həyəcanı hiss olunsa da, nəticəyə təsir edən səhvə yol vermədi. Yeri gəlmişkən, Kamran veteran futbolçu, vaxtilə “Qarabağ”ın şərəfini qorumuş Səttar Əliyevin oğludu. Görəsən, atası Kamranın premyer-liqada ilk oyununu izləyibmi? İzləyibsə, onun idarəçiliyi barədə nə düşünür?
Bu suallara cavab tapmaq üçün Səttar bəylə əlaqə saxladıq:
“Kamranın premyer-liqa oyununu televizordan ailəlikcə izlədik. Nə deyə bilərəm? Elitada ilk oyunu idi. Gələcəkdə layiq olacağı halda beynəlxalq oyunlara təyinat almasını arzulayıram. Kamran mənim kimi futbolun içində olub. “Səbail”in U-17-sində, “Qarabağ”ın əvəzedici heyətində çıxış edib. Divizionda idarə etdiyi oyunların bəzilərini izləmişəm. Bundan sonra premyer-liqadakı matçlarına da baxacam”.
Sən demə, Kamranın hakim karyerası başlamamış bitə bilərmiş. Atası onun hakim olmasına razı deyilmiş. Ancaq sonradan bəzi şəxslərin müdaxiləsindən sonra fikrini dəyişib:
“Əslində mən onun hakimliyə üz tutmasına razı deyildim. İlk dəfə mənə bu haqda deyəndə “olmaz” söylədim. Ancaq sonradan sabiq hakimlərimiz mənimlə əlaqə saxladılar, onun hakimlikdə irəli getmək perspektivinin olduğunu söylədilər. Onu da bildirdilər ki, futboldan gəldiyi üçün baş hakim kimi uğur qazana bilər. Bundan sonra oğlumun seçiminə qarışmadım. Məşqçi kimi bəzən mən də hakimlərdən narazı qalıram, onlara irad bildirirəm. Ancaq sonradan yadıma düşür ki, oğlum da ədalət təmsilçisidi (gülür). Həmişə ona deyirəm ki, heç bir komandanın haqqına girmə, çəkilən əziyyəti heçə endirmə. Ümid edirəm ki, oğlum gələcəkdə ölkənin sayılıb-seçilən referilərindən biri olacaq”.
RƏŞAD
Digər xəbərlər
