Bildiyiniz kimi, “Formula-1” üzrə dünya çempionatında bu həftə Emiliya-Romanya mərhələsi keçirilməsi, İtaliyadakı İmola trassı “Formula-1” üzrə dünya çempionatının iştirakçılarını və azarkeşlərini qəbul etməliydi. Ancaq Beynəlxalq Avtomobil Federasiyası (FIA) və “Formula-1” rəhbərliyi yerli hakimiyyət orqanları ilə birgə vəziyyəti müzakirə edəndən sonra mərhələnin ləğvinə qərar verdi.

Səbəb sadədi: təbiətin şıltaqlığı tutub. İtaliyanın şimalında yerləşən Emiliya-Romanya vilayətində leysan yağışlar üzündən təhlükəsizliklə bağlı qırmızı səviyyə elan olunub.
Mərhələnin təşkilatçıları bu yöndə açıqlamanı mayın 17-də yayıb.

İş ondadı ki, subasma şəraitində “Qran-pri”ni keçirmək, sadəcə, mümkünsüzdü. Bəyanatda deyilir: “Formula-1” icması Emiliya-Romanya regionunda yaşananlardan əziyyət çəkən adamlara və təşkilatlara dəstəyini çatdırmaq istəyir. Biz eyni zamanda köməyə ehtiyac duyanların yanına tələsən fövqəladə hallar xidmətində çalışanların işini yüksək dəyərləndiririk.

“Formula-1”, FIA prezidenti, səlahiyyətli orqanlar, İtaliya Avtomobil Klubunun prezidenti, Emiliya-Romanya regionunun prezidenti, şəhərin meri və promouter səviyyəsində aparılan müzakirələrdən sonra həftəsonu İmolada “Qran-pri” keçirməməyə qərar verdik. Ona görə bu qərarı verdik ki, tədbiri azarkeşlərimiz, komandalar, personal üçün təhlükəsiz şəraitdə keçirmək mümkün deyil.

Regionun şəhərlərinin üzləşdiyi vəziyyət fonunda bu ən doğru və məsuliyyətli addımdı. Belə çətin vaxtda yerli hakimiyyət orqanlarına və fövqəladə hallar xidmətinə təzyiq göstərmək doğru olmazdı”.

İtaliyanın şimalında vəziyyət həqiqətən də get-gedə çətinləşir. Leysan yağışları üzendən subasma bir neçə həftə əvvəl başlayıb. Onda Venetsiya, Ravenna və bəzi başqa rayonlar su altında qalmışdı. Ancaq yağışlar Emiliya-Romanya regionuna da gəlib çatdı. Məcrasından çıxan Santerno çayı da əlavə problem yaradır. Çay Entso və Dino Ferrarilərin adını daşıyan avtodromun lap yaxınlığından keçir. Artıq 5 mindən çox adam regiondan köçürülüb, hətta təbii fəlakətə qurban gedənlər də var.

Yerli hakimiyyət orqanları adı çəkilən vilayətdə fövqəladə vəziyyət rejimi elan edib, fəlakətin nəticələrinin aradan qaldırılması üçün əlavə vəsait ayırıb. Dəniz siyasəti və vətəndaşların müdafiəsi naziri Nello Muzumeçinin fikirləri: “Hökumət vəziyyətə müdaxilə etməyə hazırdı. Təxirəsalınmaz vəzifələrin həlli üçün artıq 10 milyon avro ayrılıb”.

“Formula-1”in paddoku və bokslar, demək olar ki, heç bir ziyan görməyib, ancaq “Formula-2”nin paddoku yağış suları ilə dolub. Və yerli jurnalistlərin yaydığı xəbərə görə, hava şəraiti hələ ki yaxşılaşmayıb. Nəticədə komandalar və xidməti personal mayın 17-də trassa, sadəcə, buraxılmayıb.

Belədə onlar avadanlıq və qurğuların vəziyyətini, boksların özünü yoxlaya bilməyib. Bir sözlə, mərhələnin ləğvi (təxirə salınması yox a!) zərurətə çevrilib. Yekun olaraq bunu demək olar ki, mərhələnin ləğvi avtodromun durumundan irəli gəlmir, ümumilikdə regionda yaranan vəziyyətdən, eləcə də fövqəladə hallar xidmətinin hədsiz yüklənməsindən doğub. Beləliklə, hakimiyyət orqanları və təşkilatçılar mərhələnin keçirilməsini məqsədəuyğun saymadı.

İmola mərhələsi yalnız gələn il keçiriə bilər. Ona görə ki, bu il yarışların təqvimində hər hansı ehtiyat gün nəzərdə tutulmayıb.

"FOOTBALL-PLUS.AZ"