AFFA Mingəçevir üçün bunu edəcək
Cari mövsümdə birinci divizionda çıxış edən “Mingəçevir” autsayderlər arasında yer alsa da, bu şəhərdə çox sevirlər.
Komandanın ev oyunlarında tribunlar tam dolmasa da, aşağı dəstə səviyyəsində yetərincə azarkeş gəlir. Yaşar Məmmədzadə adına stadionun özü isə tam başqa aləmdi. İdman obyektindən çox Nəbatat institunun dendrarisini xatırladır. 11 hektar sahəyə malik arena sanki meşənin içindədi. Yaşı çox, iri gövdəli ağaclar, yaşıl kolluqlar, cəh-cəh vuran quşlar...
Təəssüf ki, eyni sözləri təbii örtüklü qazon haqda danışmaq olmur. Düzdü, ot örtüyü də yaşıldı. Ancaq kələ-kötür olduğundan futbolçular topu ram etməkdə, ayaqda saxlamaqda çox əziyyət çəkirlər. Mingəçevirə səfər edən komandaların ən çox narahat etdiyi məqam da məhz budu. Bu cür qazonda oyun keçirmək futbolçuları zədə təhlükəsi ilə üz-üzə qoymaqdı.
Birinci divizionda 27-ci tur çərşivəsində baş tutan “Mingəçevir” – MOİK oyununu tribunadan canlı izlədim. Bunu oyun demək olarsa... Meydanın yararsız olması səbəbindən hər iki komanda daha çox “Məmmədağa vur qabağa” futbolu oynayırdı. Matç ordu klubunun qələbəsi ilə yekunlaşdı. Ancaq 90 dəqiqənin tamamında ən sevindirici məqam futbolçuların meydanı zədəsiz tərk etməsi oldu.
Oyundan sonra “Mingəçevir”in İdarə Heyətinin sədri Ruslan Həmidovla ayaqüstü söhbətləşmək imkanım oldu. Ruslan bəy də qazonun yararsız olmasını etiraf etdi. Ancaq onu da əlavə etdi ki, yaxın vaxtlarda stadionun ərazisind yeni meydan salınacaq:
“Bu yaxınlarda AFFA rəsmiləri Mingəçevirə gəlmişdilər. Stadionun ərazisinə baxış keçirdilər. Meydanın yararsız olması onları da narahat edir. Bu səbəbdən yeni meydan salınmasına qərar verilib. Gördüyünüz bu ərazidə (onu göstərir) standartlara uyğun yeni qazon salınacaq. Açığı, bu gün üçün bizim təbii örtük saxlamağa maddi imkanımız yoxdu. Yaşıl ota qulluq etmək böyük vəsait tələb edir. Bu üzdən böyük ehtimalla, yeni qazon süni örtük olacaq”.
Ruslan bəylə söhbət edə-edə stadionu gəzdik, yarı qum, yarı ot olan meydanda məşq edən uşaqları gördük. Onu da öyrəndik ki, məhz Ruslan bəyin təşəbbüsü və vəsaiti hesabına qışdan sonra klubun nəzdində U-16 və U-17 komandaları yaradılıb. Mingəçevir gözəl şəhərdi, bəlkə də Azərbaycanın ən yaşıl məkanıdı. Şəhər əhalisi futbolu da çox sevir. Bu səbəbdən Mingəçevirə böyük və keyfiyyətli futbol yaraşır. Daha sənəd də olsun deyə yox.
RƏŞAD
Digər xəbərlər
