Baş məşqçilər hakimlərin səhvləri haqda danışmaqda sərbəstdi - AÇIQLAMA
Misli premyer-liqasında mövsümün başa çatmasına 4 tur qalıb.
Cari “futbol ili”ndə maraqlı tendensiya ilə qarşılaşırıq. Belə ki, oyunlardan sonra təşkil olunan mətbuat konfranslarında baş məşqçilər hakimlər haqda rahat danışır, hətta onların səhvlərini açıq şəkildə dilə gətirirlər. Lakin əvvəlki mövsümlərdə buna görə klublar cəzalanır və cərimə olunurdu. İndi isə bununla bağlı qərarlara rast gəlmirik. Hər halda, İntizam Komitəsinin açıqladığı qərarlarda bu cəzalar və cərimələr göstərilmir.
Bunun səbəbi nədi?
"Football-plus.az" olaraq sualımızı PFL-in mətbuat və marketinq direktoru Sənan Abdullayevə ünvanladıq:
"Baş məşqçilərin mətbuat konfransında hakimlərin ünvanına şər-böhtan və təhqiramiz ifadələr işlətməsi qadağandı. PFL-in Əsasnaməsi bu məqamı tənzimləyir".
Açıqlamadan belə başa düşdük ki, baş məşqçilər artıq premyer-liqa matçlarından sonra hakimlərin səhv qərarları ilə bağlı fikirlər səsləndirə bilər. Amma müəyyən çərçivədə. Yəni çalışdırıcılar referiləri təhqir etmədən, şərləmədən onlar haqda açıqlama verməkdə sərbəstdi.
İLKİN SULTANLI
Digər xəbərlər
