Region Liqasında “dördlər finalı”nın məkanı növbəti həftə açıqlanacaq
AFFA hər il Region Liqasında “dördlər finalı”nı fərqli şəhərlərdə keçirir.
Ötən mövsüm Şamaxı, ondan əvvəl isə Bakı həlledici mərhələyə qucaq açmışdı. Görəsən, bu dəfə necə olacaq? Bu suala cavab tapmaq üçün Region Liqası üzrə İşçi Qrupun üzvü, AFFA-nın Uşaq və Gənclər üzrə Yarışların Təşkili Şöbəsinin müdiri Yusif Vəliyevlə əlaqə saxladıq:
“Dördlər finalı”nın harda keçiriləcəyi ilə bağlı hələ konkret qərar yoxdu. Hazırda fərqli variantları nəzərdən keçiririk. Bölgələrdən biri də ola bilər, Bakı da. Ancaq bizim üçün prioritet bölgədi. Böyük ehtimalla, ötən mövsüm olduğu kimi, bu dəfə də Bakıdan kənarda olacaq. Növbəti həftə bu suala aydınlıq gələcək. Böyük ehtimalla mayın ilk günündə qərar veriləcək”.
Yusif bəy bizimlə söhbətdə AFFA-nın bayrağı altında təşkil olunan aşağı yaş qrupu üzrə liqalar barədə də məlumat verdi:
“Ötən gün (srağagün) aşağı yaş qrupu üzrə liqalarda pley-off mərhələsinin püşkü atıldı. Bu həftədən etibarən liqalarda həlledici mərhələ start götürür. Ümumiyyətlə, mayın sonu və iyunun əvvəlində çempionlar və mükafatçılar bəlli olacaq”.
Digər xəbərlər
