"Bakıda matçlara hazırlıq məqsədilə 4 gün məşq etmişdik. Toplanışa tam heyətlə yollandıq. Bu oyunlar bizim üçün çox faydalı oldu. Şimali Makedoniya güclüdü. Onlara qarşı oynamaq istənilən halda nəsə qazandırır.
İlk matça taktiki, fiziki və psixoloji cəhətdən tam hazır idik. Rəqibin heyətində keyfiyyətli futbolçular olsa da, oyun tərzimizi yaxşı tanımadıqları üçün istədiklərini edə bilmədilər. Biz isə onların son iki matçını izləyib təhlil etmişdik. Komanda tapşırıqları layiqincə yerinə yetirdi.

Birinci hissədə üstünlük bizdə oldu. Həsən Nəzərli 35-ci dəqiqədə qələbə qolunu vurdu. İkinci hissənin ilk 20 dəqiqəsində rəqib daha fəal oldu. Pressinqlə təzyiqi artırdılar. Bunun qarşısını almaq üçün yorulan futbolçuları əvəzlədik. Nəticədə yenidən üstünlüyü ələ aldıq.

Növbəti matça daha ciddi yanaşdıq. Məğlubiyyətdən sonra makedoniyalıların daha aqressiv, istəkli və məsuliyyətli oynayacağını bilirdik. Əvvəldən heyətdə bəzi dəyişikliklər etdik. Oyun ərzində də geriləməmək üçün yorğun oyunçuları dərhal əvəz edirdik. Bu dəfə sanki fərqli komanda ilə üz-üzə idik. Buna baxmayaraq, futbolçular özünü itirmədi. 89 və 90+3-cü dəqiqələrdə Röyal Fərzullazadənin vurduğu qollar sayəsində ev sahiblərini məğlub etdik.

Bu qarşılaşmada hakim idarəçiliyindən narazı qaldım. Makedoniyalılar çox kobud oynayırdılar. Futbolçuların zədələnmə riski yüksək idi. Lakin hakimlər bu məsələyə ciddi yanaşmırdı. Rəqibə vərəqə göstərilmədi. Hətta kiçik müdaxilələrlə komandama təzyiqlər oldu. Sonda penalti təyin etdi və rəqib 1 qol vurdu. Oyun sistemində və taktiki gedişlərdə dəyişiklik edib qələbə qazana bildik.

Ümumilikdə U-17 çox istəkli, əzmkar, fədakar və cəsur oynadı. Bütün epizodlarda riskləri gözə alıb düşünmədən irəli atıldılar. Hesabda geri düşdükləri anda belə qələbə ümidini itirmədilər. Sonadək mübarizə apardılar. Sevinirəm ki, milli üzvü olmağa layiq futbolçuları seçmişik".

"Artıq onları daha yaxşı tanıyırıq. Hər birinin keyfiyyətlərinə və xarakterlərinə bələdik. Həm ölkədə, həm də beynəlxalq arenada özlərini müsbət yöndə göstərirlər. Səmimi deyim ki, çox yüksək nəticələr əldə edə biləcək səviyyədədilər. Bunun üçün daha çox çalışmaq lazımdı. Məşqçilər olaraq bizim məsuliyyətimiz də böyükdü. Əlimizdən gələni edirik ki, ümidləri doğruldaq. Bu göstəricilərdən məharətlə istifadə etmək vacibdi".

"İlin əvvəlindən inkişaf istiqamətində planlar qurulub. Təlim-məşq toplanışları uğurla davam edir. Beynəlxalq qarşılaşmaların keçirilməsi bizim üçün çox faydalı olur. Aprelin 30-da Albaniyanın paytaxtı Tiranada keçiriləcək UEFA İnkişaf turnirinə qatılacağıq. Farer adaları, Albaniya və Moldovanın U-17 komandaları ilə qarşılaşacağıq. Qəbələdə iyunda Gürcüstanın, avqustda isə Çernoqoriyanın 17 yaşlıları ilə ümumilikdə 4 yoldaşlıq oyununun keçirilməsi planlaşdırılıb. Sentyabrda isə Ərzurum şəhərində Türkiyənin müvafiq yaş üzrə milli komandası ilə oynayacağıq. Daha sonra Bakıda 10 günlük növbəti təlim-məşq toplanışı nəzərdə tutulub.

Bütün görüşlərdən sonra isə komanda Avropa çempionatının seçmə mərhələsində iştirak üçün tam hazır vəziyyətdə olacaq".