“Bu gün itirilən xal fəlakətə bərabər ola bilərdi”
Misli premyer-liqasında 30-cu tura yekun vurulur.
“Football-plus.az” xəbər verir ki, “Şamaxı” “Sumqayıt”ı qəbul edib - 0:0. Oyundan sonra qonaqların çalışdırıcısı Samir Abasovun mətbuat konfransı keçirilib. Sizi mütəxəssisin fikirləri ilə tanış edirik:
“İlk dəqiqələrdən gərginlik hiss olunurdu. Hər iki komanda səhv etməkdən qorxurdu. Bu gün itirilən xal fəlakətə bərabər ola bilərdi. Şamaxı çox çətin səfərdi. Bizdən qat-qat yaxşı komandaların burada nə problemlər yaşadığını görmüsüz. Meydança, hava amili təsir edir. Bəzi məqamlarda üstünlüyü ələ keçirmişdik. Daha qətiyyətli olsaydıq, 3 xalla dönə bilərdik. Amma buna heyfslənmirik, çempionat davam edir”.
- İkinci hissədə daha çox hücum etdiz. Bu, "Şamaxı"nın yorulması ilə bağlı idi?
- Yox. İlk hisssə rəqib qapanmışdı. Top onlarda olanda biz də o vəziyyətdə olurduq. İkinci hissədə "Şamaxı" da irəliyə atıldı. Ona görə daha çox hücumlar edə bildik. Oyun davam etdikcə futbolçular açılışır. Təəssüf ki, son nöqtəni qoya bilmədik.
- İlnur Valievi artıq birinci qapıçı hesab etmək olar?
- Aydın Bayramov zədədən yeni qayıdıb. 3 gündü bizimlə məşq edir. Kimin birinci qapıçı olduğunu deyə bilmərəm. Kim yaxşıdısa, qapıda o da duracaq.
- Qarşıda 6 tur var. Nə gözləyirsiz?
- Ən əsası evdəki matçlarda qələbə qazanmalıyıq. Səfərdə "Kəpəz"ə də məğlub olmasaq, ümid etmək olar. Bunu da etməyə çalışacağıq.
- Şahin Diniyev bildirdi ki, premyer-liqanı kim tərk etsə, bu, həmin klub üçün faciə olacaq. Sizin fikriniz necədi?
- Mən bir ay əvvəl demişdim, fikrimi müzakirəyə çıxardılar. Heç kimin premyer-liqanı tərk etməyini istəmirəm. Hərə bir cür başa düşür. Deyirlər ki, özünə görə deyirsən. 12 ildi “Sumqayıt" yaranıb. Bizim yaxşı akademiyamız var. Yenidən komanda qurmaq çox çətindi. Çoxları deyir ki, idman prinsipləri pozulur. Mən belə düşünmürəm. Hansısa komandanın premyer-liqanı tərk etməsi həmin şəhərin futboluna təsir edəcək. Klub sayı artsa, daha yaxşı olar.
Digər xəbərlər
