“Yazın gəlişi ilə işlərdə canlanma olub. Artıq nəzərdə tutulan tədbirlərdən bəzilərini həyata keçirmişik. Belə ki, ötən ay Şimal Regional Futbol Federasiyası tərəfindən ulu öndər Heydər Əliyevin 100 illik yubileyinə həsr olunan bord-futbol turniri keçirildi. Qeyd edim ki, 12 yaşlıların qatıldığı turnirdə “Sumqayıt” qalib gəldi. Eyni zamanda, 5 mart - Bədən Tərbiyəsi və İdman Günü ilə bağlı tədbirlərimiz baş tutdu. Digər tərəfdən, Qusar rayonunun mərkəzində yerli İcra Hakimiyyətinin təşkilatçılığı ilə keçirilən Novruz şənliyində idmançılar müxtəlif idman sahələri üzrə çıxış etdi. Novruz bayramı tədbirləri rayon rəhbərliyinin böyük marağına səbəb oldu. Hamı idmançıların yaratdığı bayram əhval-ruhiyyəsindən razı qaldı. Bu aya gəlincə, Gənclər və İdman Nazirliyi aprelin 10-da Azərbaycanın 5 rayonunda “Üzməyi öyrənək” adlı pilot layihəyə start verildi. Sevindirici haldı ki, Qusar həmin 5 rayondan biridi. Pilot layihə sayəsində şəhərin 2 saylı tam orta məktəbinin şagirdləri üçün pulsuz üzgüçülük dərsləri təşkil olunur. Bu layihə ətrafında daha öncə 4 saylı tam orta məktəb şagirdlərinin iştirakı ilə birləşmişdik. Burda əsas yeniliklərdən olan üzgüçülük bölməsinin fəaliyyətini xüsusi vurğulamaq istəyirəm. Çünki qış aylarında şimal rayonunda belə bölmənin işinə davam etməsi üçün böyük xərc tələb olunur. Qaz, su, işıq probleminin və başqa önəmli məsələlərin həlli üçün yardımını əsirgəməyən gənclər və idman naziri Fərid Qayıbova təşəkkür edirəm. Soyuq aylarda üzmək üçün gələnlərin sayı az olsa da, işlərə fasilə verilməməsi faydalı addımdı. Bunun nəticəsidi ki, gənclərimiz fasiləsiz bu idman növü ilə məşğul ola bilir. Yüzlərlə 1-5-ci sinif şagirdləri üzgüçülüyə həvəsləri olduğu üçün bizə müraciət edib. Həqiqətən Qusarda idman sahələri böyük maraqla və rəğbətlə qarşılanır”.

“Aprelin 15-16-da AFFA tərəfindən kompleksdə qızlardan ibarət futzal yığmaları arasında turnir təşkil ediləcək. Bundan başqa, qızlar arasında voleybol turniri də Qusar Olimpiya İdman Kompleksinə həvalə olunub. Yeri gəlmişkən, bu səbəbdən Azərbaycan Voleybol Federasiyasının rəhbərliyinə, xüsusilə birinci vitse-prezident Faiq Qarayevə təşəkkürümü bildirirəm. Daha iki bölmənin açılışını həyata keçirmişik. Yeni idman növlərindən biri olan yunan-Roma güləşi və basketbol üzrə bölmələrimiz artıq fəaliyyətə başlayıb. Bir neçə gün əvvəl Alpinizm Federasiyasının baş katibi İsrafil Aşurlu qonağımız oldu. Onunla yeni olimpiya növü olan idman dırmanması üzrə bölmənin açılması yönündə imkanları müzakirə etdik. Çox güman, qısa zamanda bu istiqamətdə işlər görüləcək. Digər yeniliklərdən biri isə açıq havada minifutbol meydançasının tezliklə istifadəyə veriləcəyidi. Artıq süni örtüyün döşənməsi başa çatıb. Texniki çatışmazlıqlar aradan qaldırılandan sonra bu hədəfimiz reallaşacaq. Bizim kompleksdə Respublika Olimpiya və İdman Liseyinin şagirdləri də məskunlaşıb. Onlar imkanlarımızdan maneəsiz istifadə edib rahat şəraitdə məşqlərini keçir. Uşaq və yeniyetmələr üçün kompüter oyunları mərkəzi də açmışıq. Həvəskarlar həmin bölmədə vaxtını səmərəli keçirə bilir. Kompleksimizdə trenajor, bilyard, stolüstü tennis, minifubol, voleybol, badminton, döyüş idman növlərindən isə karate, kikboksinq, sambo, MMA, ciu-citsu bölmələri fəaliyyət göstərir. Onu da nəzərinizə çatdırım ki, bir neçə gün əvvəl yunan-Roma güləşi üzrə milli komandanın baş məşqçisi Aleksandr Tarakanov və köməkçisi Rövşən Bayramov kompleksimizə gəlib şəraitlə tanış oldu. Qusar Olimpiya İdman Kompleksi güləş üzrə dünya çempionatı ərəfəsində Azərbaycanda təşkil olunacaq beynəlxalq təlim-məşq toplanışının keçiriləcəyi məkanlar arasında əsas namizədlərdəndi. Təbii ki, yekun qərarı federasiya verəcək. Onu da qeyd edim ki, bütün yeniliklər haqda sosial şəbəkələr vasitəsilə ictimaiyyətə müntəzəm məlumat veririk”.