“İlin sonuna qədər fərqi aradan qaldırmalıyıq”
“Mersedes”in britaniyalı pilotu Lüis Hemilton bəzi məsələlərlə bağlı açıqlama verib.
"Football-plus.az" xəbər verir ki, onun fikrincə, komandasına “Red Bull” ilə rəqabət aparmaq üçün müəyyən vaxt lazımdı:
“İlin sonuna qədər fərqi aradan qaldırmalıyıq. “Red Bull”a baxsaz, görərsiz ki, bu komanda inkişafı davam etdirəcək. “Red Bull”da əla komanda formalaşıb, əminəm ki, onların bolidin inkişafıyla bağlı planları var”.
Hemilton üçqat dünya çempionu Nelson Pikenin onun ünvanına yönəltdiyi irqçi ifadələrə görə 953 min dollar cərimələnməsinə də münasibət bildirib:
“Braziliyanın hakimiyyət orqanlarına ehtiramımı çatdırmaq istəyirəm. Onların adamı məsuliyyətə cəlb etməsi, belə hallarla barışmayacağını göstərməsi möhtəşəmdi. İrçilik və homofobiya yolverilməzdi, bizim cəmiyyətdə belə anlayışlara yer yoxdu. İstərdim ki, dünyadakı başqa dövlətlər də belə hərəkət etsin. Yaxınlarda Uqandada nələrin baş verdiyini gördük. Afrikanın və Yaxın Şərqin başqa ölkələrində də belə arzuolunmaz tendensiya var”.
Yeddiqat dünya çempionu 2016-dan bəri əməkdaşlıq etdiyi fizioterapevt və məşqçi Ancela Kallenin xidmətindən imtinası haqda da danışıb:
“Ancela indi öz həyatını yaşayır. Onun nə etmək istəyi ilə bağlı çoxlu ideyası var. Demək olar ki, hər gün yazışırıq. Hələ də paraşütdən birgə tullanmaq niyyətindəyik. Həmişə bir-birimizin həyatında olacağıq. Təəssüf ki, onunla eyni nöqtədə ilişib qaldıq. Hərçənd birlikdə ən müxtəlif çətinlikləri arxada qoymuşduq. Münasiblətlərimizin belə yaxşı olmasına görə minnətdaram. İndi mənə “Maklaren”dəki ilk yarışda yanımda olan Stivo yardım edəcək”.
Dünya çempionatında arxada qalan ilk iki mərhələdən sonra Hemilton fərdi hesabda 5-ci yeri tutur. “Mersedes” isə Mühəndislər kubokunda 38 xalla 3-cü pillədədi.
Digər xəbərlər
