“Barselona” rəhbərliyi Lionel Messi ilə danışıqlar aparılmasıyla bağlı xəbəri təsdiqləyib.
"Football-plus.az" xəbər verir ki, bu haqda klubun vitse-prezidenti Rafa Yuste açıqlama verib.
O, PSJ ilə müqaviləsinin müddəti iyunun 30-da bitəcək argentinalı hücumçu ilə əlaqə saxladıqları, onun İspaniya klubuna mümkün qayıdışını müzakirə etdikləri ilə bağlı suala müsbət cavab verib:
“Messidən geri qayıtmasını xahiş edəcəyəm? Mən onun geri dönməsini istəyirəm? Aramızda əlaqələr var? Bütün suallara “hə” cavabını verərdim. Leo və ailəsi mənim onlara olan bağlılığımdan xəbərdardı. Bir neçə il əvvəl müqavilənin yenilənməsi ilə bağlı danışıqlarda iştirak etmişdim. Təəssüf ki, o vaxt alınmadı. Mən onun qayıtmasını istərdim. Belə olsa, sevinərəm. Həyatda gözəl hekayələr yaxşı bitməlidi. Bəli, onunla əlaqəmiz var”.
Xatırladaq ki, 2021-ci ildə azad agent kimi PSJ-yə keçən Messi “Barselona”da 17 il çıxış edib.