Milli komanda AÇ-2024-ün seçmə mərhələsinin F qrupunda keçirdiyi ilk iki görüşdə qapısından ümumilikdə 9 top buraxdı, əvəzində isə 1 qol vura bildi.

Biabırçı oyun və məğlubiyyətlər futbol ictimaiyyətini dilə gətirdi. İndi hamını düşündürən bir sual var: De Byazi ilə yeni müqavilə bağlamağa nə ehtiyac var idi? Ümumiyyətlə, onu yığmada hələ də niyə saxlayırlar? Futbol azarkeşləri düşünür ki, De Byazi ilə müqavilə ləğv olunmalı və təzminatı ödənilərək yola salınmalıdı. İtaliyalı mütəxəssisin qovulmasının və ya qalmasının müsbət və mənfi tərəflərini araşdıracağıq.

Xoş olmayan söhbətlərə son qoyulucaq
Bildiyiniz kimi, Maksim Medvedevlə Qara Qarayev yığmaya çağrılmır. Bunun səbəbi onların De Byazinin oynatdığı futboldan razı olmamasıdı. Yığmanın iki kapitanı italiyalının fəlsəfəsinə güvənmir. Bunu da həm telekanallarda, həm də mediada açıq dilə gətirirlər. De Byazi isə onlara ehtiyacı olsa da, dəvət göndərmir. Bu səbəbdən də müdafiənin sağ cinahında və dayaqda axsamalar olur. De Byazinin gedişi hər iki futbolçunun, ya da ən azı Qaranın yığmaya yolunu açacaq.

Dövrün başlaması üçün hazırlıq
AÇ-2024-ün seçmə mərhələsində hələ 6 oyunumuz qalıb. Ümumiyyətlə, tsikl noyabrda başa çatacaq. Bir çoxları düşünür ki, belə məqamda baş məşqçi ilə yolları ayırmazlar. Gəlin, bir az fərqli düşünək. AÇ-2024-ün seçmə mərhələsində növbəti oyunumuz iyunda olacaq. Həmin vaxta kimi yeni çalışdırıcı tapmaq mümkündü. Hətta yeni baş məşqçi premyer-liqanın son dövrəsinin oyunlarını izləyə, yaxşı heyət formalaşdıra bilər. AFFA rəhbərliyi bir şərti mütləq yerinə yetirməlidi. De Byazinin yerinə gələn şəxslə ən azı ikiillik müqavilə bağlanmalıdı. Yəni AÇ-2024-ün seçmə mərhələsi Millətlər Liqası üçün güclü hazırlıq dövrü sayılmalıdı. Onsuz da bu qrupdan çıxmaq şansımız möcüzəyə bağlıdı. Lakin yeni çalışdırıcının öz fəlsəfəsini yığma üzvlərinə aşılamağa zamanı olacaq. Yəni həmin şəxsin qarşısına Millətlər Liqasının qrupunda 1-ci olmaq hədəfi qoyulmalıdı. Belə olan halda gələcəkdə “nəticə qazanmaq üçün yetərincə vaxt yox idi” fikrini səsləndirə bilməyəcək.

AFFA rəhbərliyinə inam artacaq
Yuxarıda qeyd etdiyimiz kimi, futbol ictimaiyyətinin əksər təbəqələri De Byazinin getməsini istəyir. Yəqin AFFA-dakılar da bundan xəbərdardı. Hamı yığmanın uğursuzluğunun əsas səbəbkarı kimi italiyalı mütəxəssisi qınayır. Onu bu vəzifəyə təyin edənlər isə İcraiyyə Komitəsinin üzvləridi. İtaliyalı mütəxəssisin göndərilməsinə qərar verilsə, bu, qurumun sarsılan imicinin bir qədər yüksəlməsinə səbəb ola bilər.

Yeganə mənfi cəhət
De Byazinin müqavilə müddəti seçmə mərhələnin sonuna kimidi. Qrup oyunları noyabrda başa çatacaq, belə çıxır ki, AFFA italiyalıya 8 ayın maaşını ödəməlidi. Yəqin ki, yeni anlaşmada “tskldə əldə edilən nəticələrə görə istefaya göndərilsə, təzminat aşağı olacaq” bəndi yer almış olar. Belədə iş daha da asanlaşır. Hər halda, İcraiyyə Komitəsinin üzvü Mahir Məmmədov qəzetimizə açıqlamasında demişdi ki, az maaşa işləməyə razı olub. De Byazini buna razı salan AFFA başbilənləri, yəqin ki, yuxarıda qeyd olunan bəndi də müqaviləyə əlavə etməyi unutmayıb. Belə olmasa da, ümumi maaşını nəzərə alsaq, federasiya italiyalıya maksimum 300-400 min avro civarında təzminat ödəyəcək. Düzdü, bu məbləği hansısa stadionun bərpasın və ya divizionda bir klubun fəaliyyət göstərməsinə xərcləmək olar. Lakin indiyə kimi boşa sovrulan milyonları nəzərə alsaq, De Byazinin getməsi üçün bu pulu verməyə dəyər.

Yuxarıda qeyd etmişdik ki, bu yazıda De Byazinin getməsinin və ya qalmasının müsbət və mənfi cəhətlərini diqqətinizə çatdıracağıq. Lakin sözümüzün üstündə dura bilmirik. Çünki onun yığmada qalmasının müsbət məqamlarını tapa bilmədik. Ümid edirik ki, buna görə bizi bağışlayarsız.

İLKİN SULTANLI