Srağagün AFFA İcraiyyə Komitəsinin növbəti iclası keçirilib. Tədbir qurumun inzibati binasında baş tutub. Bir sıra vacib məsələlər, o cümlədən millinin baş məşqçisi ilə bağlı müzakirələr aparılıb.

Qərarlarla tanış olduz. Təbii ki, ən vacib məsələ milli komandanın baş məşqçisi Canni de Byazi ilə müqavilənin müddətinin uzadılmasıdı. İctimaiyyət arasında italiyalı mütəxəssisin göndərilməsini istəyənlər çox idi. Hətta yığmanın üzvləri Qara Qarayevlə Maksim Medvedev də onun qalmasını istəmirdi. Yəni De Byazinin əleyhinə olan məqamlar olduqca çox idi. Lakin qərar fərqli oldu. 66 yaşlı mütəxəssisin müqaviləsi daha 1 seçmə mərhələ müddətinə qədər uzadıldı. Bunun sadə səbəbi var. AFFA İcraiyyə Komitəsi yerli mütəxəssisin yığmaya rəhbərlik etməsini istəmir. Bu məlumatı ötən saylarımızın birində diqqətinizə çatdırmışdıq. Bəs nə üçün başqa əcnəbi yox, məhz De Byazi?

İcraiyyə Komitəsinin üzvləri italiyalının rəhbərlik etdiyi komandanın Millətlər Liqasında ardıcıl 3 qələbə qazanmasını əsas götürüb. De Byazi yaxşı-pis komanda formalaşdırıb. Futbolçular artıq qələbənin dadını bilir. Yığma 3 oyundu məğlub olmur. Bunu nəzərə alan AFFA başbilənləri yeni baş məşqçiyə güvənməklə risk etmədi. Başqası yeni başlanğıc edəcək və fərqli bəhanələr söyləyəcəkdi. De Byazi isə komandanın potensialına inandığını, onlara vaxtın lazım olduğunu dilə gətirərək öz yerini möhkəmləndirdi. İstənilən halda, De Byazinin getməsi daha məqsədəuyğun olardı. Amma onunla da razılaşmaq lazımdı ki, başqa əcnəbinin gəlməsindənsə, italiyalının qalması yaxşıdı. AFFA-nın yerli mütəxəssisə güvənməməklə düz və ya yanlış qərar verdiyini isə zaman göstərəcək.

İcraiyyə Komitəsi U-19 millisinin baş məşqçisi Miloş Velebitlə müqaviləyə xitam verilməsini təsdiqləyib. Bu doğru qərardı. Serbiyalı mütəxəssisin komandası Avropa çempionatının seçmə mərhələsində Bolqarıstan, Türkiyə və Lüksemburqa məğlub oldu. Qrupu 0 xalla bitirməyimiz, təbii ki, baş məşqçinin işinə təsir etməliydi. Onsuz da yeni komanda 18 yaşlı futbolçulardan qurulacaq. Yəqin ki, bu vəzifəyə Aqil Nəbiyevin təyinatı gərçəkləşəcək. Velebit 17 və ya 21 yaşadək futbolçulardan ibarət yığmanın çalışdırıcısı olmalıydı. Böyüklərin baş məşqçisi Samir Əliyevdi. Onun təyinatı yeni rəsmiləşib. Velebiti yenidən U-17-yə qaytarmaq isə səhv qərar olardı. Çünki serbiyalı bu prosesi keçib, özünü doğrultmayıb. Bu səbəbdən də AFFA doğru olanı edərək onunla vidalaşdı.

Qızlardan ibarət yığmalara təyinatlar və başqa məsələlərlə bağlı qərarların hamısı gözlənilən idi. Qadın futbolunda dəyişiklər labüd idi ki, bu da baş verdi. Qalan qərarlarla bağlı isə ətraflı şərh vermək olmur. Lisenziyalaşdırma qaydalarında və Futbol Veteranları Fondunun Əsasnaməsində hansı dəyişikliklərin olduğu ictimaiyyətə bəlli deyil. Yoxlama-Təftiş Komitəsinin tərkibinin təsdiqi də lazımlı idi. SOCAR-dan klublara veriləcək maliyyəyə nəzarət etmək lazımdı. Yəqin ki, bu işə layiq olanlar tərkibə daxil olublar. Ən azı buna ümid edirik.

İLKİN SULTANLI