Bir neçə gün Canni de Byazinin yığmadakı taleyinə aydınlıq gəldi.

Artıq məlum olduğu kimi, komanda növbəti seçmə mərhələnin oyunlarına da onun rəhbərliyi altında çıxacaq. Amma açıq qalan bir sual var:

AFFA-dakı iclasdan bir gün əvvəl İTV-nin efirində baş məşqçini sərt şəkildə tənqid edən, hətta onun peşəkarlığına şübhə ilə yanaşan kapitan Maksim Medvedevlə münasibətlər necə tənzimlənəcək? Heç şübhəsiz, De Byazi bu ölkədə onun haqqında deyilənlərdən və yazılanlardan xəbərdardı.

Bir müddət əvvəl “Qarabağ”ın qapıçısı Şahruddin Məhəmmədəliyevlə aralarında münaqişə də yaranmışdı. Yaxın tarixdə “Qarabağ”ın daha bir yerli ulduzu Qara Qarayevlə “boy söhbəti”ni izlədik. İndi də “Qarabağ”ın digər ulduzu Maksim baş məşqçiyə, yumşaq desək, hörmətsizlik edir, hətta Rəşad Sadıqovun adını komandanın potensial çalışdırıcısı kimi çəkir, AFFA-nın ona üç-dörd il şans verməli olduğunu deyir.

Özünə hörmət etməyi bacaran məşqçi, yəni De Byazi bütün bu olaylara necə reaksiya verəcək? Özümüzü onun yerinə qoyaq və düşünək: hansı baş məşqçi peşə bacarığına şübhə ilə yanaşan futbolçunu və hətta kapitanı belədə yığmaya çağırar? Sizi bilmirəm, belə durum şəxsən mənim zərrəcə xoşuma gəlmədi. “Qarabağ”ın iki əsas oyunçusunun adının De Byazi ilə münaqişədə hallanması yaxın gələcəkdə milli komanda ətrafında xoş olmayan atmosferin yaranacağından xəbər verir. Mən ölü, siz diri, bu sözümü qulağınızda sırğa edin, saxlayın...

HUŞƏNG