“Hər kəsin fikirlərinə hörmətlə yanaşıram. Ancaq yığma üzvlərinin fiziki cəhətdən axsadığını söyləmək bir qədər absurddu. Həmin Ramil Şeydayev, Elvin Cəfərquliyev təxminən 1 ay öncə “Qarabağ”ın heyətində “Gent”ə qarşı 120 dəqiqə başabaş mübarizə aparıb. Oyundan sonra Renat Dadaşovun üzünə baxanda hiss edirsən ki, hələ bir 90 dəqiqə oynamaq iqtidarındadı. Bir də ki, indi hansı zəmanədi? Hər bir klubda, yığmada müasir texnologiyadan istifadə olunur. Məşqçilər korpusu GPRS vasitrəsi ilə hər bir oyunçunun fiziki göstəricilərini əlinin içi kimi bilir. Komanda fiziki cəhətdən axsayırsa, onda medianın nə yazmasından asılı olmayaraq, müdafiə futbolu oynayırsan. Birinci zonada kompakt müdafiə ilə gələn topu uzaqlaşdırırsan. Sonra deyirsən ki, fiziki cəhətdən zəif olduğumuza görə eninə-uzununa qaçmaq əvəzinə məhz belə oyun modelini ortaya qoyuram. Uğursuz nəticədən sonra azarkeş kimi danışmaq düzgün deyil. Bir də ki, fərdi səhvlərdən sonra qapımızda qollar görmüşük. Həmin xətalar 1-ci dəqiqədə də var idi, 90-da da. Fikrimcə, yığmanın problemi rəqiblərdən fiziki cəhətdən geri qalmaq deyil”.