Sərbəst güləş üzrə milli komandada Namiq Abdullayev dönəmi başa çatdı.

Onun boşaltdığı posta isə Xetaq Qazyumov gətirildi. Federasiya rəhbərliyi bu dəyişikliyi Abdullayevin işlərinin çoxluğu ilə əsaslandırır. Düzdü, bunda müəyyən həqiqət payı var. Doğrudan da, 2020-ci ilin sentyabrından millinin çalışdıran olimpiya çempionu federasiya daxilində “yüklənib”. İcraiyyə Komitəsinin üzvü kimi işinin artması, regionlarda güləşin inkişafı üçün layihələrin həyata keçirilməsi və ümumilikdə Azərbaycanda sərbəst güləşin tərəqqisi istiqamətində əlaqələndirici funksiyanın yerinə yetirməsi çox vaxt alır. Amma bu heç də əsas səbəb deyil. Fikrimizcə, əsas səbəb yığmanın onun rəhbərliyi altında qeyr-sabit çıxış etməsidi. Deyilənə görə, komandada intizamla bağlı da problemlər var. Federasiya rəhbərliyi də qərar verərkən həm bu məqamları, həm də olimpiya tsiklinin yaxınlaşdığını nəzərə alıb. Onu da unutmayaq ki, güləş milli idman növü olmaqla yanaşı, həmçinin ən “gəlirli” sahədi. Qazanılan medalların sayına baxmaq kifayətdi. Ona görə də “dəmir əl” axtarışı qaçılmaz idi ki, sonda məhz Qazyumovun xeyrinə seçim edildi.

Bilməyənlər üçün xatırladaq ki, Xetaq uzun illər yığmamızın kapitanı olub. Peşəkarlığı, işinə məsuliyyətlə yanaşması və ən əsası, sabit çıxışı ilə diqqəti çəkib. 2007-ci ildən millinin şərəfini qorumağa başlayıb. Olimpiadanın 3 qat mükafatçısı, dünya və 3 qat Avropa çempionu, 1-ci Avropa Oyunlarının qalibidi. Başqa sadalamadığımız uğurları da var. İdmançı karyerasını başa vurandan sonra isə Şimali Osetiya yığmasına rəhbərlik edib. Onun köməkçilərindən biri də güləş həvəskarlarına tanış simadı. Söhbət Şərif Şərifovdan gedir. Yəqin ki, olimpiya, dünya və Avropa çempionunun əlavə şərhə ehtiyacı yoxdu. İnanmaq istərdik ki, bu ikili federasiya rəhbərliyinin seçimdə yanılmadığını ortaya qoyacaqları iş və nəticələr ilə göstərəcək. Bunun üçün də çox gözləməli olmayacağıq. Olimpiya tsikli hər şeyi göstərəcək.

Qadın güləşi millimizdə də baş məşqçi dəyişikliyi gerçəkləşib. Ötən sayımızda xəbər verdiyimiz kimi, komanda daha öncə sərbəst və qadın güləşi yığmalarımızı çalışdıran Semyon Çterevə tapşırılıb. 2021-ci ilin oktyabrından baş məşqçi səlahiyyətlərini icra edən Rövşən Umudova isə uğurlar arzulanıb. AGF mütəxəssislə əməkdaşlığı bundan sonra da davam edəcək. Bu dəyişiklik haqda çox danışmağa ehtiyac görmürük. Ən azı ona görə ki, millidə Mariya Stadnikdən başqa parlaq güləşçi yoxdu. Nüfuzlu yarışlarda medalları əsasən ukraynalı legioner sıralayır. Görünür, AGF bolqar mütəxəssisi qaytarmaqla bu millidə də nəticələr baxımından irəliləyişə nail olmaq istəyir. Nə deyirik, təki uğurlu olsun.

KƏNAN HƏSƏNOV