2018-də təxminən 20 illik prezidentlik dönəmi başa çatan və ''Fənərbaxça''dan ayrılaraq özünü ailəsinə həsr edən Əziz Yıldırım haqda xəbər var.

"Football-plus.az" xəbər verir ki, bilindiyi kimi 2011-ci ilin yayında Türkiyə futbolunda danışılmış oyunlarla bağlı böyük bir qalmaqal yaşanmış və ''Fənər'' oyun alqı-satqısında günahlandırılmışdı. Əziz Yıldırım isə həyatının 364 gününü həbsxanada keçirməli olmuşdu. Amma sonradan bu həngamənin qurama olduğu və bu işdə FETÖ-nün barmağı olduğu sübuta yetirilmişdi. Əziz Yıldırım isə ona dəyən maddi və mənəvi ziyana görə Türkiyənin Xəzinə və Maliyyə nazirliyinin məhkəməyə vermişdi. Yıldırım ümumilikdə 777 milyon lirədən çox təzminat tələb edirdi. Anadolu 14-cü Ağır Cəza Məhkəməsi bu məsələ ilə bağlı qərarını açıqlayıb. Məhkəmənin rəyinə əsasən Yıldırıma 8 min lirə maddi və 100 min lirə mənəvi təzminat ödənilməlidi. Amma bu məbləğin üstünə faizlər də gələcək. Çünki hadisə 12 il əvvəl baş verib. Bu qərarın ardından məsələ ilə bağlı dosye instansiya məhkəməsinə ötürülüb.