“Qarabağ” ictimaiyyətə hesabat verəcək - AÇIQLAMA
Bildiyiniz kimi, “Qarabağ” martın 26-da Bakı Olimpiya Stadionunda (BOS) "Qalatasaray"la qarşılaşacaq. Görüş xeyriyyə məqsədi daşıyır. Lakin görüşün yayınlayacaq kanalın adı bəlli deyil.
"Football-plus.az" olaraq məsələ ilə bağlı həm “CBC Sport”un, həm də klubun mövqeyini öyrəndik. Öncə telekanalın Xəbərlər Departamentinin rəhbəri Şəmsəddin Abbasovu dinləyək:
“Bu istiqamətdə danışıqlar gedir. Bu səbəbdən də indi nəsə deyə bilməyəcəyik. Amma bunu qeyd edim ki, “Qarabağ” həmişə bizim mövqeyimizi başa düşüb. Yəni mediada yazılanlar qədər ciddi problem yoxdu. Matça marağı da bilirik. Çalışırıq ki, ən yüksək səviyyədə bu görüşü çəkib, tamaşaçılara təqdim edək”.
“Qarabağ”ın mətbuat xidmətinin rəhbəri Gündüz Abbaszadənin fikri isə belə oldu:
“Hələ ki yayınçının kim olacağı ilə bağlı rəsmi xəbər yoxdu. Başqa telekanallarla da danışıqlarımız gedir. Onların adını çəkmək istəmirəm. Lakin anlaşdığımız kimsə yoxdu. Bunu da qeyd edim ki, biz yayından gələn gəliri də Türkiyədə baş verən zəlzələ zamanı zərərçəkənlərə yönəldəcəyik. Bunu da şəffaf şəkildə ictimaiyyətə açıqlayacağıq”.
Gündüz bəy oyunun təşkilatçılıq işlərini məhz “Qarabağ”ın üzərinə götürdüyünü də bildirdi:
“Təbii ki, bu məsələ bizim üzərimizə düşür. Onlar bura qonaq gəlir. “Qalatasaray”ın yerləşdirilməsi və başqa məsələləri biz həll edəcəyik”.
İLKİN SULTANLI
