Məlum olduğu kimi, "Qarabağ" yoldaşlıq-qardaşlıq görüşündə "Qalatasaray"la qarşılaşacaq.

"Football-plus.az" xəbər verir ki, oyun martın 26-da Bakı Olimpiya Stadionda keçiriləcək. Oyunun yayını ilə bağlı problem var. Belə ki, matçın "CBC Sport"da göstərilməsi gözlənilsə də, telekanal rəhbərliyi yayınhaqqı ödəmək istəmir. Ağdam klubu isə oyun ətrafında ajiotajın böyük, bəzi iri şirkətlərin də yayına sponsor etməkdə maraqlı olduğunu nəzərə alaraq, yayın hüququnu müəyyən məbləğ qarşılığında satmaqda qərarlıdı. Hətta ola bilər ki, oyunu nə "CBC Sport", nə də "İdman TV" göstərsin. Daha çox pul ödəyən telekanal matçı tamaşaçılara təqdim edəcək.

Bəlkə də kimsə "Qarabağ"ı yayın hüququna görə pul istəməkdə qınayacaq. Bəribaşdan bildirək ki, klub həmin hüququn satışından əldə olunacaq pulu da zəlzələdən zərər çəkənlər üçün fonda köçürəcək. Beləliklə, indi əsas sual budu: hansı telekanal çiynini yükün altına verəcək?

İLKİN SULTANLI