Dünən Konfrans Liqasının 1/8 finalının cavab oyunu çərçivəsində ''İstanbul BŞ'' ''Gent''i qəbul etdi. Bilindiyi kimi Belçika təmsilçisi bundan əvvəlki mərhələdə təmsilçimiz ''Qarabağ''ı mübarizədən kənarlaşdırmışdı.

"Football-plus.az" xəbər verir ki, bir həftə öncə Belçikada keçirilən ilk görüş 1:1 hesabı ilə yekunlaşmışdı. Buna görə də türklər cavab oyunu ərəfəsində favorit hesab olunurdular. Amma İstanbuldakı qarşılaşma ''Gent'' üçün gözlənilmədən asan gəzintiyə və bu klubun gənc forvardı Gift Orbanın benefisinə çevrildi. ''Gent'' artıq fasiləyə qədər 4 top vurmaqla oyunun taleyini həll etdi və yekunda 4:1 hesablı qələbə qazandı. Bu qış Norveç təmsilçisi ''Stabek''dən 3,3 milyon avroya transfer edilən 2002-ci il təvəllüdlü Orban xarüqələr yaratmaqda və inanılmaz məhsuldarlıq sərgiləməkdə davam edir. Ötən həftəsonu Belçika çempionatında ''Sulte Varegem'' ilə səfər oyununda poker edən və 1958-dən bu yana ''Gent''in heyətində rəsmi oyunda 4 qol vuran ilk futbolçuya çevrilən nigeriyalı hücumçu İstanbulda da şounu davam etdirdi. O, 31, 32 və 34-cü dəqiqələrdə olmaqla 3 dəqiqə 24 saniyəyə 3 top vurdu! Bu, performansla gənc forvard inanılmaz bir rekord müəyyənləşdirdi. O, avrokuboklar tarixində ən qısamüddətli het-trikin müəllifi oldu!

Əvvəlki rekord cəmi bir neçə ay öncə müəyyənləşdirilmişdi. Onun müəllifi ''Liverpul''lu Məhəmməd Salah idi. Oktyabrın 12-də Çempionlar Liqasının qrup mərhələsində ''Reyncers''lə səfər oyununda (7:1) Salah 6 dəqiqəyə het-trik etmişdi. Deyəsən, dünya futbolunda Erlinq Holannın yeni davamçısı peyda olub. Son 2 rəsmi oyuna 7, ümumilikdə isə ''Gent''in heyətində meydana çıxdığı 9 oyuna 12 qol vuran Orban indidən nəhənglərin diqqətini cəlb etməyə başlayıb.